Міністэрства культуры не прызнала рэдактара сайта творчым работнікам

Нагадаем, што сёлетні дэкрэт “аб дармаедстве” закрануў таксама і журналістаў-фрылансераў. Падатак не тычыцца тых, хто самастойна сплаціць 20 базавых велічыняў у дзяржаўную казну.

Але што рабіць тым, хто не напрацаваў сёлета на падатак у 3 мільёны 600 тысяч, але з’яўляецца журналістам ці рэдактарам уласнага сайта?

Паводле ўказа №251, ад уплаты згаданага падатку вызваляюцца творчыя работнікі, статус якіх пацвярджаецца адмысловай камісіяй, створанай пры Міністэрстве культуры.

Паводле палажэння пра камісію, сярод крытэраў прыняцця станоўчага рашэння ёсць такі: “Вынікі творчай дзейнасці асобы павінныя з’яўляцца новымі, самастойнымі вынікамі інтэлектуальнай дзейнасці, адносіцца да твораў мастацкай літаратуры і мастацтва і іншых вынікаў у галіне культуры, мастацтва і іншай культурнай творчай дзейнасці”.

Ніякіх асаблівых умоваў для журналістаў ці рэдактараў сайтаў дакумент не ставіць, таму прэс-служба ГА “БАЖ” папрасіла калегу паспрабаваць прайсці шлях прызнання творчым работнікам.

Жанчына рэдагуе ўласны сайт для дзяцей, на якім размяшчае вынікі сваёй інтэлектуальнай дзейнасці: адукацыйныя прэзентацыі, артыкулы і нават вершы. Разам з заявай у камісію былі скіраваныя шматлікія раздрукоўкі з сайта.

Аднак, як вынікае з адказу камісіі, аўтарцы сайта ў атрыманні статуса творчага работніка было адмоўлена.

Калега накіравала скаргу на рашэнне камісіі, але пакуль відавочна, што статус творчых работнікаў журналістамў і рэдактарам Мінкульт надаваць не спяшаецца.  

Міністэрства культуры: “Журналістаў творчымі работнікамі яшчэ не прызнавалі…”