Галоўны рэдактар “Народнай волі” сустрэўся з магілёўскімі чытачамі (ФОТА)

Падчас сустрэчы спадар Сярэдзіч распавёў пра сённяшняе жыццё газеты, падзяліўся планамі выдання на будучыню і адказаў на шматлікія пытанні ўдзельнікаў сустрэчы.

Прыезд галоўнага рэдактара папулярнай газеты выклікаў вялікую цікавасць у жыхароў Магілёва – на сустрэчу сабралася каля сямідзесяці чалавек. Іосіф Паўлавіч грунтоўна адказваў на ўсе пытанні, хаця сярод іх хапала і вострых. На думку рэдактара, “Народная воля” піша пра тое, што сапраўды хвалюе беларусаў, заўсёды стараецца даваць аб’ектыўную інфармацыю і прытрымлівацца нейтральнай пазіцыі.

Іосіф Сярэдзіч выказаў меркаванне, што “Народная воля” магла б рабіць адмысловы рэгіянальны дадатак для жыхароў Магілёўшчыны, калі ў гэтым будуць зацікаўленыя мясцовыя дэмакратычныя грамадскія арганізацыі – гэта дазволіла б павялічыць колькасць падпісчыкаў газеты ў рэгіёне. Таксама галоўны рэдактар “Народнай волі” даў свае парады некалькі магіляўчанам, што звярнуліся да яго з просьбай дапамагчы ў вырашэнні асабістых праблем.

Напрыканцы сустрэчы Іосіф Паўлавіч па просьбе яе ўдзельнікаў пакінуў свае аўтографы ахвотным і сфатаграфаваўся з імі на памяць.

Сустрэча ў Магілёве доўжылася больш за 2, 5 гадзіны. Яе дапамагалі зладзіць мясцовыя актывісты прафсаюза РЭП і сябры ГА “БАЖ” Магілёўшчыны.

Газета “Народная воля” выдаецца з ліпеня 1995 года, ад самага пачатку яе заснавальнікам і галоўным рэдактарам з’яўляецца Іосіф Паўлавіч Сярэдзіч.