У Беларусі расследуюцца крымінальныя справы за публікацыі на 1863x.com

Як паведаміла карэспандэнтцы інфармагенцтва БелаПАН Таццяне Каравянковай афіцыйная прадстаўніца СК Юлія Ганчарова, расследаванне вядзецца па дзвюх крымінальных справах: ч. 1 арт. 130 (распальванне расавай, нацыянальнай альбо рэлігійнай варажнечы) і ч. 2 арт. 343 (распаўсюд парнаграфічных матэрыялаў).

БелаПАН нагадвае, што сайт 1863х.com быў створаны прыкладна паўтара гады таму ананімам з нікам Джон Сільвер (Jhon Sil­ver). “На ім публікуюцца палітычныя тэксты, нярэдка з крытыкай уладаў Беларусі і Расіі. Стваральнік сайта вядзе яго на ўмовах поўнай ананімнасці. Адзіным сродкам сувязі з ім з’яўляецца Інтэрнэт, з дапамогай якога ён меў зносіны з аўтарамі і даваў інтэрв’ю”, – піша агенцтва.

Першым пра крымінальныя справы паведаміў на сваім сайце сам Джон Сільвер. Па яго словах, гэта здарылася ў маі 2015 года і суправаджалася затрыманнем спецслужбамі і змяшчэннем яго ў “псіхушку”. Восенню 2015 года ён пакінуў Беларусь, а ў пачатку 2016 года ў СМІ з’явілася інфармацыя пра яго затрыманне на тэрыторыі Расіі і магчымую будучую экстрадыцыю ў Беларусь. Па інфармацыі БелаПАН, МУС Беларусі абвясціла яго ў вышук за парушэнне падпіскі пра нявыезд.

Нагадаем, што Следчы камітэт вядзе таксама праверку па скарзе віцебскага суддзі на публікацыю сайта freeregion.info. Нагодай для звароту суддзі ў Следчы камітэт стала публікацыя «Судьи превосходят в беззаконии его творцов», што з’явілася на рэсурсе 12 студзеня г.г. Паводле freere­gion, суддзя Андрушэнка хоча, каб аўтара прыцягнулі да адказнасці па трох артыкулах Крымінальнага кодэкса: 368 (публічная знявага Прэзідэнта Рэспублікі Беларусь), 369 (публічная знявага прадстаўніка ўлады) і 391 (знявага суддзі ў сувязі з ажыццяўленнем ім правасуддзя). Пад публікацыяй стаіць імя Пятра Іванова – “старшыні Генеральнага савета па стварэнні міжнароднага грамадскага аб’яднання «За сумленную ўладу»”.