Жукоўскі балатуецца ў парламент ад АГП. Бастунец: Не трэба блытаць журналістыку з палітыкай (Абноўлена)

— Я шмат працую з людзьмі, ведаю многа інфармацыі пра карупцыю ва ўладзе і падчас выбарчай кампаніі паспрабую гэту інфармацыю данесці да людзей. Да таго ж, я скарыстаюся статусам кандыдата ў дэпутаты (калі яго атрымаю), каб трапіць у кабінеты чыноўнікаў і нарэшце мець магчымасць запісаць усё на тэлекамеру, — заявіў Жукоўскі прэс-службе ГА “БАЖ”.

Па словах журналіста, ён не лічыць, што парушае статут ГА “БАЖ” і таму намераны працягваць удзел у палітычнай кампаніі. Разам з тым, Кодэкс журналісцкай этыкі ГА “БАЖ” наўпрост патрабуе ад журналіста быць нейтральным да палітыкі.

“Як і любы грамадзянін, журналіст мае права на палітычныя ды іншыя перакананні і прыхільнасці. Аднак у сваёй прафесійнай дзейнасці ён павінен заставацца нейтральным і аб’ектыўным”, — гаворыцца ў Кодэксе.

Каментуючы сітуацыю, старшыня ГА “Беларуская асацыяцыя журналістаў” Андрэй Бастунец кажа: журналісту не варта змешваць журналістыку з палітыкай і займацца адначасова і тым, і гэтым, бо такія паводзіны могуць паставіць пад пагрозу аб’ектыўнасць.

Кастуся Жукоўскага сёлета ўжо 7 разоў судзілі за працу без акрэдытацыі на карысць спадарожнікавага тэлеканала “Белсат”. Журналіст-фрылансер  з’яўляецца свайго роду рэкардсменам па колькасці такіх штрафаў летась і сёлета.

upd. Увечары 13 ліпеня стала вядома, што Кастусь Жукоўскі вырашыў прыслухацца да парадаў калег і адмовіцца ад свайго удзелу ў выбарчай кампаніі.

Анлайн-канферэнцыя з Сашай Раманавай. Пятніца, 13.00. Дасылайце пытанні!