Назіральнікі за выбарамі: СМІ недастаткова асвятляюць кампанію

Пра гэта гаворыцца ў тыднёвай справаздачы кампаніі “Праваабаронцы за свабодныя выбары” па выніках назірання з 11 да 17 ліпеня.  

“Кандыдаты ад дэмакратычных сілаў аддаюць перавагу вулічным пікетам, паколькі для іх гэта не толькі сродак збору подпісаў, але і магчымасць заявіць пра сябе ва ўмовах адсутнасці доступу да дзяржаўных СМІ”, – пішуць аўтары справаздачы.  

“Агульная сітуацыя ў краіне складаецца такім чынам, што дзяржаўныя СМІ падтрымліваюць і асвятляюць дзейнасць толькі праўладных патэнцыйных кандыдатаў. Пра дзейнасць астатніх кандыдатаў практычна не ўзгадваецца, ці ўзгадваецца фрагментарна”.

“Дзяржаўныя СМІ публікуюць артыкулы агульнага характару з заклікам да ўдзелу ў выбарах. Незалежныя СМІ асвятляюць дзейнасць дэмакратычных кандытатаў даволі слаба, або наогул не пішуць пра выбарчую кампанію”.

Назіральнікі прыводзяць прыклады, калі рэгіянальныя выданні – «Новополоцк сегодня», «Наш край» (Баранавічы), «Праца» (Зельва) – прысвячаюць адразу па некалькі публікацый праўладным кандыдатам і нічога не пішуць пра астатніх.  

Назіранне ажыццяўляюць актывісты РПГА «Беларускі Хельсінкскі камітэт» і ПЦ «Вясна» ў рамках кампаніі «Праваабаронцы за свабодныя выбары».