Віцебскі праваабаронца паскардзіўся на сайт mogilev.by

Спадар Свецік лічыць неабходным правесці кваліфікаваную праверку, ці не ўтрымліваюць артыкулы пра неабходнасць будаўніцтва ў Віцебску копіі полацкага Сафійскага сабора ўзору ХІ стагоддзя праяваў экстрэмізму. Бо аўтар Анатоль Шлыкаў, адданы прыхільнік царкоўнага будаўніцтва, дазваляе сабе пісаць пра сваіх апанентаў у абразлівым тоне, называючы іх “дзецьмі Сатаны”, ужываючы выразы “беларускія радыкалы”, “свядомыя” (у двукоссі), “нашчадкі катаў — паліцаяў, якія здрадзілі сваёй Айчыне” і гэтак далей. Артыкулы ўтрымліваюць таксама зняважлівыя выказванні пра беларускую мову і нацыянальную сімволіку.

Міністэрства інфармацыі накіравала матэрыялы, названыя ў звароце Леаніда Свеціка, у Рэспубліканскую экспэртную камісію на прадмет наяўнасці (адсутнасці) у іх прыкмет праявы экстрэмізму. Камісія мусіць правесці  экспэртызу і зрабіць высновы, ці ёсць падставы для прыцягнення да адказнасці ўладальніка сайта mogilev.by у адпаведнасці з законам Рэспублікі Беларусь ад 17 ліпеня 2008 года “Аб сродках масавай інфармацыі”.

Менавіта гэтага  і просіць віцебскі праваабаронца — вынесці папярэджанне выданню ў выпадку выяўлення словаў і выразаў, якія ў публікацыях Анатоля Шлыкава нясуць пагрозу мірнаму суіснаванню грамадзян розных нацыянальнасцяў і веравызнанняў у Рэспубліцы Беларусь, зневажаюць гонар і годнасць беларусаў, абражаюць носьбітаў беларускай мовы, якая з’яўляецца дзяржаўнай мовай, прызнанай у якасці роднай пераважнай колькасцю  жыхароў краіны”.  Непрымальным, на думку сябра ГА БАЖ, ёсць і тое, што артыкулы спадара Шлыкава штучна абвастраюць канфлікт прыхільнікаў і праціўнікаў будаўніцтва ў Віцебску копіі Сафійскага сабора і могуць прывесці да крытычнай кропкі — адкрытага сутыкнення бакоў.

Рэспубліканская экспертная камісія па ацэнцы інфармацыйнай прадукцыі на прадмет наяўнасці (адсутнасці) у ёй прыкмет праявы экстрэмізму была створаная ў жніўні 2014 г. На дзве траціны яе складаюць дзяржаўныя чыноўнікі, у тым ліку прадстаўнікі ведамстваў (КДБ, Мытнага камітэта і інш.). Таму рашэнне адносна артыкулаў Анатоля Шлыкава ў той ці іншай ступені можна будзе лічыць паказальным.