У Гродне з’явіўся дыскусійны клуб

Арганізатары сустрэчы здолелі сабраць амаль тры дзесяткі гродзенскіх грамадскіх актывістаў, журналістаў і сябраў розных палітычных партый.

Вёў сустрэчу сябра ГА «Беларуская асацыяцыя журналістаў» Уладзімір Хільмановіч.

«Апошнім часам бракуе дыскусійных сустрэч, на праваабарончую тэматыку ў тым ліку. І я лічу, што чым больш будзе такіх сустрэчаў і вострых пытанняў. Часам такія сустрэчы выходзяць за межы, яны схіляюцца ў нейкую палітычную плоскасць, эканамічную, сацыяльную. Але праваабарончы аспект застаецца. Мы хочам падымаць розныя тэмы, якія не вырашаюцца дзесяцігоддзямі, якія хвалююць грамадства», — адзначыў Хільмановіч у каментары baj.by.

«Па адной сустрэчы вельмі складана нешта сказаць, Але, калі будуць адбывацца падобныя абмеркаванні, — гэта класна. Балючыя праблемы беларусаў не так часта падымаюць, таму хаця б вось так абмеркаваць, паразмаўляць», — выказаўся адзін з выступоўцаў — гродзенскі журналіст і музыка Алесь Дзянісаў.

Павел Мажэйка, журналіст і кіраўнік Цэнтра гарадскога жыцця (#uCen­try) мяркуе, што мы, як грамадзяне гэтай краіны, не ведаем, што адбываецца.

“І больш таго, мы нават не ведаем куды ідзе наша краіна. У гэтай сітуацыі адзін са шматлікіх спосабаў, але спосаб правераны і добры — гэта размаўляць. Бачыць, што ты не адзін і вакол ёсць іншыя людзі, якія маюць свой погляд на гэту дзяржаву, на яе будучыню. Не важна, гэта можа быць меркаванне адрознае ад майго, але яно ёсць. У такім кантакце, у такой супрацы, у такім абмене мяркаванняў мы ствараем краіну, ствараем яе будучыню. Таму такія сустрэчы,  дыскусійныя клубы патрэбныя, людзі хочуць размаўляць пра будучыню. Дзяржава такой магчымасці ім практычна не дае», — адзначае Павел Мажэйка.

Наступная сустрэча дыскусійнага клуба ў “Цэнтры гарадскога жыцця” будзе прысвечаная тэме смяротнага пакарання і пройдзе 22 лютага. Плануецца, што на сустрэчу прыедзе старшыня праваабарончага цэнтра “Вясна” Алесь Бяляцкі.