Глыбоцкія журналісты зладзілі прэс-кафэ ў Браславе і прыняла ўдзел у інтэлектуальнай гульні Інтэл.Drive (+фоты)

Абмеркаванне праходзіла ў фармаце прэс-кафэ, падчас якога адбывалася гатаванне страваў. БАЖаўцы і іх сябры, грамадскія актывісты з іншых рэгіёнаў, вырабілі “Кіеўскі торт”, які мае даволі складаны рэцэпт, і мюнхенскія каўбаскі з бульбяным гарнірам і соусам.

Па словах каардынатара глыбоцкай суполкі Таццяны Смоткінай, культурніцкай тэмай людзі асабліва не цікавяцца, але ўсё ж трэба пісаць на гэтую тэматыку і даносіць да людзей інфармацыю. Бо ў рэгіёнах шмат таленавітых і крэатыўных майстроў і мастакоў, творчасць якіх трэба заўважаць і распавядаць пра яе людзям. Вядомы мастак з Глыбоччыны Язэп Драздовіч у свой час рэкламаваў сябе сам, ходзячы па хатах і малюючы свае маляванкі і партрэты. А ў цяперашні час вялікая роля ў гэтым належыць медыя. Многія беларусы не ходзяць на выставы ці творчыя імпрэзы, але цікавяцца гэтымі падзеямі ў інтэрнэце і сацыяльных сетках.

Таксама глыбачане ўпершыню прынялі ўдзел у інтэлектуальнай гульні Інтэл.Drive у жанры паб-квіз, якая ладзіцца ў Браславе ў дзесяты раз.

Адміністратар сайта Braslaw.by Галляш Сялява, які здзяйсняе тэхнічную і інфармацыйную падтрымку гэтай гульні, кажа, што праекту Інтэл.Drive каля трох год. Ідэя гульні належыць выкладчыку матэматыкі Браслаўскай гімназіі Дзмітрыю Мацкевічу. У свой час ён ладзіў брэйн-рынгі. А потым вырашыў зрабіць інтэлектуальную гульню ў іншым фармаце, каб людзі змаглі ў спакойнай атмасферы папіць кавы ды гарбаты і паўдзельнічаць у інтэлектуальных баталіях. Гэта адно з найбольш маштабных мерапрыемстваў у Браславе, туды прыязджаюць каманды і з іншых рэгіёнаў, людзям яно вельмі падабаецца.