Пасля 11 гадоў забароны ў падпіску вярнулася і “Газета Слонімская”

Калі пасля прэзідэнцкіх выбараў 2006 года “Газету Слонімскую” ў шэрагу іншых недзяржаўных грамадска-палітычных выданняў пазбавілі падпіскі і магчымасці продажу ў шапіках прадпрыемстваў “Саюздрука”, было адчуванне (прынамсі, у аўтара гэтых радкоў) вялікай крыўды ды несправядлівасці, але і жаданне паказаць і даказаць лялькаводам ад улады, што мы здольныя існаваць і без іх манаполек на распаўсюд СМІ.

Даказалі. Стварылі сваю сістэму падпіскі і распаўсюду. Газета засталася запатрабаванай у чытачоў і рэкламадаўцаў, развівалася, павялічвалася ў аб’ёме і ў колеры, хоць і згубіла ў накладзе.

Аднак за апошнія 11 гадоў кардынальна змяніліся спосабы распаўсюду і спажывання інфармацыі. Цяпер рэдакцыя “ГС”, як і многія іншыя рэдакцыі газет, больш інфармацыйнага прадукту стварае для сайта, чым для папяровай версіі сваіх выданняў.

І вось газету вярнулі ў шапікі “Гроднааблсаюздрука”, а пасля і ў падпіску на пошце… Рыхтуючы ў друк зварот да чытачоў пра падпіску ў паштовых аддзяленнях, злавіў сябе на думцы, што не адчуваю ад таго вялікай радасці.

Мяркуйце самі. Камплект падпіскі “Газета Слонімская” + “Оддушина” на другое паўгоддзе 2017 года будзе каштаваць на пошце для індывідуальных падпісчыкаў 5,81 рубля на месяц, 17,43 рубля на тры месяцы і 34,86 рубля на паўгода. А цяперашняя рэдакцыйная падпіска каштуе 4, 12 і 24 рублі адпаведна. Як кажуць, адчуваеце розніцу?.. Падпісчык розніцу заўважыць.

“Мы вымушаныя былі ўзгадніць з “Белпоштай” менавіта такія кошты, бо па ранейшых падпіска была б наогул стратнай для рэдакцыі”, — патлумачыў падаражанне падпіскі для чытачоў выдавец і галоўны рэдактар “Газеты Слонімскай” Віктар Валадашчук.

Але адна акалічнасць цяпер дакладна радуе: у нашых распаўсюднікаў, у шапіках “Саюздруку”, у  многіх гарадскіх і сельскіх крамах “Газету Слонімскую” і “Оддушину” можна купіць за 60 капеек.

Нагадаем, у лютым рэдактар “Народнай волі” Іосіф Сярэдзіч сустракаўся з Аляксандрам Лукашэнкам. Ён перадаў кіраўніку дзяржавы спіс дзевяці недзяржаўных перыядычных выданняў, якія не могуць трапіць у тую ці іншую дзяржаўную сетку распаўсюду. Лукашэнка абяцаў вырашыць праблемы з распаўсюдам недзяржаўных СМІ.

Тыя, хто звярнуўся ў дзяржаўныя сістэмы распаўсюду, сапраўды атрымалі станоўчыя адказы ўпершыню за шмат гадоў.

Газета «Intex-press» вярнулася ў шапікі

“Борисовские новости” вяртаюцца ў шапікі «Саюздруку» і гандлёвыя цэнтры

Упершыню ад 2003 году газэта «Свободные новости» трапіла ў падпіску «Белпошты»

«Газета Слонімская» ўпершыню за 11 гадоў у кіёсках

«Новы Час» — у кіёсках Мінска і Мінскай вобласці