Журналістаў з Глыбокага будуць судзіць за матэрыялы пра абавязак камунальных службаў вывозіць смецце

Суд над Таццяный Смоткінай адбудзецца 31 траўня а 14.30, над  Змітром Лупачам — 1 чэрвеня, таксама а 14.30.

Нагадаем, журналістаў-фрылансераў будуць судзіць быццам бы за парушэнне артыкула 35 “Закона аб СМІ”, за якое міліцыянты прадугледжваюць адказнасць па частцы 2 артыкула 22.9 КаАП (за незаконны выраб і распаўсюд прадукцыі СМІ).

Падставай для прыцягнення да адміністрацыйнай адказнасці Таццяны Смоткінай стаў матэрыял на сайце “Беларускага Радыё Рацыя” “Вываз смецця — паслуга абавязковая”. У ім распавядалася пра праблемы інваліда-пенсіянера Аляксандра Крупскага з Крулеўшчыны Докшыцкага раёна. За вываз смецця яму налічылі буйную суму. Таксама ў матэрыяле закраналася пытанне заключэння і скасавання дамоваў, інфармавання несельніцтва на гэты конт.

Змітра Лупача вінавацяць у вырабе журналісцкага матэрыяла на такую ж тэму, але для незалежнага тэлеканала “Белсат”. У сюжэце незадаволеныя людзі з вёскі Варганы Докшыцкага раёна  распавядалі  пра  налічэнне вялікіх сум за вываз смецця і парадак яго вывазу.

Нагадаем, днямі на Смоткіну і Лупача склалі яшчэ пяць пратаколаў у Глыбоцкім РАУСе, таму іх чакаюць яшчэ суды і ў Глыбокім.

Незалежныя журналісты перакананыя, што такім чынам улады аказваюць ціск, каб яны адмовіліся ад сваёй прафесійнай дзейнасці і перасталі падаваць праўдзівую, аператыўную і аб’ектыўную інфармацыю.