Кацярыну Андрэеву і Сяргея Кавалёва аштрафавалі за сюжэт для праграмы, якой не існуе

Суд за стрым з «Чарнобыльскага шляху» адбыўся 26 чэрвеня без удзелу Кацярыны Андрэевай. Пастанову суду яна атрымала па пошце, адкуль і даведалася пра вынікі паседжання. Як адзначаецца ў пастанове, журналістка, працуючы без акрэдытацыі МЗС, «праводзіла апытанне грамадзянаў, што ўдзельнічалі ў масавай акцыі, тым самым незаконна вырабіла прадукцыю СМІ» (арт. 22.9 ч.2 КоАП). Адпаведнае рашэнне прыняў суддзя суду Савецкага раёну Вера Галаўкова.

Суд за працу на мітынгу прафсаюзаў адбыўся 28 чэрвеня. Кацярыну Андрэеву і Сяргея Кавалёва прызналі вінаватымі ў супрацы з «Белсатам» без акрэдытацыі МЗС і аштрафавалі паводле арт. 22.9 ч. 2 КоАП (незаконны выраб і распаўсюд прадукцыі медыяў). Самае цікавае, што, паводле суду, Андрэева і Кавалёў «незаконна вырабілі» відэасюжэт, які нібыта выйшаў у эфіры «Белсату» ў праграме «Навіны», хаця праграмы з такой назваю на тэлеканале не існуе. Рашэнне вынес суддзя Іван Касцян. Пастановы Андрэева і Кавалёў атрымалі толькі цяпер.

«Насамрэч, я ўжо трошкі згубіла лік гэтых пратаколаў і судоў. Не тое, каб гэты пераслед моцна адбіваўся на маім жыцці і працы, але, натуральна, непрыемна. Абскарджваць я нават не бяруся, бо сістэма працуе не ў адпаведнасці з законам і накіраваная выключна на выкананне загадаў. Відавочна, што пераслед палітычна матываваны і ў маім выпадку на акрэдытацыю разліваць не даводзіцца. Разам з тым, я спадзяюся, што прыйдзе час, калі такі атавізм як дазвол МЗС будзе непатрэбны журналісту замежнага СМІ», – адзначыла Кацярына Андрэева ў каментары belsat.eu.

Нагадаем, ад пачатку 2018 года за супрацу з «Белсатам» журналістам агулам прысудзілі штрафаў больш чым на Br 43 000.

Штрафы журналістам па арт. 22.9 КаАП (табліца)