У Віцебску затрымалі Барыса Хамайду. Адразу пасля інтэрв’ю незалежнаму журналісту

Барыс Хамайда расказаў, што ў чацвер, 14 сакавіка, як заўсёды стаяў каля дома па вуліцы Леніна, 28 у Віцебску — распаўсюджваў незалежныя выданні, чым займаецца ўжо не першы год на гэтым месцы.

“Міліцыянты падышлі прыкладна праз 10 хвілін пасля таго, як я паразмаўляў з журналістам. Гаворка была пра 25-годдзе Канстытуцыі Рэспублікі Беларусь, бо 15 сакавіка — Дзень Канстытуцыі. Журналіст адышоў па сваіх справах, а да мяне пад’ехала міліцэйская машына. Супрацоўнікі запатрабавалі, каб я збіраў свой столік і бел-чырвона-белы парасон ды сыходзіў з гэтага месца. Я адмовіўся, і мне было заяўлена, што я парушаю заканадаўства аб масавых мерапрыемствах і таму мяне затрымліваюць”, — распавёў Барыс Хамайда.

Журналіст Зміцер Казакевіч стаў сведкам затрымання і спрабаваў заступіцца за сталага чалавека:

— Я спытаў у міліцыянтаў, што адбываецца. Тым часам яны пхалі ў багажнік рэчы спадара Хамайды. Мне адказалі, што ніхто нікога не затрымлівае, проста “чалавек выклікаў таксі». Прагучала гэта зусім не ветліва.

У пастарунку парушэнне заканадаўства аб масавых мерапрыемствах ужо не згадвалі: актывіста абвінавацілі  ў парушэнні правілаў добраўпарадкавання і ўтрымання населеных пунктаў. Хамайду сказалі, што ягоны столік і парасон нібыта загрувашчваюць вуліцу, і яму паводле арт. 21.14 КаАП пагражае пакаранне ў выглядзе штрафа памерам да 5 базавых велічынь.

Пратакол  Барыс  Хамайда не падпісаў. Але сам інцыдэнт яго непрыемна ўразіў: амаль цягам года міліцыянты не мелі да яго ніякіх прэтэнзіяў. Апошні раз Барыса Хамайду затрымлівалі летась у чэрвені перад адкрыццём “Славянскага Базару ў Віцебску”.