Віцебскаму “Магістрату” — 20 гадоў

Ідэю займець сваё выданне калісьці выказалі сябры БНФ “Адраджэнне”, кажа рэдактар “Магістрата” Кастусь Смолікаў:

— У 1990‑я гады ў Віцебску выходзіла газета “Выбар”, рэдактарам якой быў сябар БНФ “Адраджэнне” Барыс Хамайда. Нам хацелася, каб віцябляне ведалі партыйныя навіны, тады гэта было вельмі актуальна, і мы друкавалі іх у “Выбары”. Але газету пазбавілі рэгістрацыі, і паўстала пытанне пра новы сродак масавай інфармацыі. Нарадзілася назва “Магістрат”, у 1997—98 гадах выйшлі пілотныя выпускі газеты.

Спадар Смолікаў з’яўляецца нязменным рэдактарам выдання з 1999 года. “Магістрат” пачаў выходзіць на сталай аснове,  і менавіта з таго часу вядзецца адлік  ягонага “узросту”.

— Наклад “Магістрата” — 299 экзэмляраў, гэта дазволеная колькасць для выдання і распаўсюду незарэгістраванай газеты. Намераў зарэгістравацца ў нас ніколі і не было, бо няма ніякай верагоднасці, што партыйная газета будзе зарэгістравана, — тлумачыць рэдактар.

Цяпер “Магістрат” — выданне Віцебскай абласной рады партыі БНФ, якое  распаўсюджваецца на грамадскіх імпрэзах з рук у рукі. Таксама газету можна знайсці ў інтэрнэце: у раздзеле “Перыёдыка” беларускай інтэрнэт-бібліятэкі “Камунікат” захоўваюцца нумары “Магістрата” за апошнія некалькі гадоў.

За 20 год існавання газета ператварылася з партыйнага бюлетэня ў выданне для ўсіх гараджан. Гэта ў значнай ступені дайджэст: тут перадрукоўваюцца матэрыялы іншых СМІ, прысвечаныя праблемам Віцебшчыны, ёсць таксама аўтарскія матэрыялы пра жыццё горада і вобласці. На думку ўкладальніка і рэдактара Кастуся Смолікава, гэта надзвычай важна, бо ў Віцебску няма больш ніводнага друкаванага недзяржаўнага выдання грамадска-палітычнай накіраванасці.