Вітаўт Руднік святкуе юбілей і рыхтуе да выдання «Вялікую кнігу чэмпіёнаў»

Сродкі на выданне Вітаўт Руднік збірае на платформе Molam­o­la. Аматары футбола абавязкова мусяць звярнуць увагу на гэтую кнігу.

«26 жніўня мне стукнула 50. У якасці падарунку самому сабе на гэты юбілей некалькі год я задумаў выданне кнігі, якая мае стаць вынікам адной з галоўных справаў майго жыцця. Ужо больш за 30 год у вольныя ад журналісцкай ды адукатарскай працы час гадзіны я займаюся гісторыяй сусветнага футболу. Вынікам гэтай працы стала падрыхтоўка «Вялікай кнігі чэмпіёнаў. 1908–2018».

У гэтай кнізе сабраныя некалькі тысяч біяграфій-даведак пра футбалістаў і трэнераў, якія перамагалі ў чатырох самых прэстыжных турнірах нацыянальных зборных каманд: Алімпійскіх гульнях, чэмпіянатах свету, чэмпіянатах Еўропы і Кубку Амерыкі.

Гэта сапраўды ўнікальнае выданне, аналагаў якому няма ў свеце. Цвёрдая вокладка, больш за 600 старонак тэксту з унікальнымі фотаздымкамі, з аўтографам аўтара ўсім, хто падтрымае кампанію. Калі вы хочаце павіншаваць мяне з юбілеем, то ведаеце, за які падарунак сёлета я буду асабліва ўдзячны. Дзякуй за падтрымку і дапамогу ў распаўсюдзе гэтай інфармацыі!»

ГА «БАЖ» віншуе спадара Вітаўта з Днём народзінаў! Зычым вялікіх творчых планаў ды грандыёзных спраў! Хай мары збываюцца!