Прэс-туры, трэнінгі, экалагічныя акцыі і сустрэчы з вядомымі журналістамі, — глыбоцкія БАЖаўцы абмеркавалі планы на 2020 год

На пачатку лідар Глыбоцкай суполкі ГА “БАЖ” Таццяна Смоткіна  выступіла перад прысутнымі са справаздачай дзейнасці суполкі за 2019 год і акцэнтавала ўвагу на найбольш значных імпрэзах, якія ладзілі глыбоцкія журналісты. Гэта акцыі, прымеркаваныя да Дня свабоды прэсы і да Міжнароднага дня салідарнасці журналістаў, прафесійныя трэнінгі і семінары, а таксама традыцыйныя імпрэзы, якія ладзяцца сумесна з грамадскімі актывістамі і журналістамі з іншых рэгіёнаў.

Сёлета газета “Вольнае Глыбокае” святкавала сваё 25-годдзе, выпусціла тысячны нумар, а яе рэдактар Уладзімір Скрабатун да таго адзначыў і свой юбілей. Сябры  суполкі падчас сходу павіншавалі з гэтымі падзеямі спадара Скрабатуна і ўручылі яму памятны падарунак ад арганізацыі.

Наступным этапам сходу стаў мазгавы штурм: журналісты агучвалі свае прапановы па актывізацыі працы ў 2020 годзе і правядзенні новых мерапрыемстваў. Так журналіст і блогер Кастусь Шыталь прапанаваў ладзіць лакальныя прэс-туры па вёсках і мястэчках, каб знаёміць чытачоў, слухачоў і гледачоў з новымі мясцінамі і людзьмі.  Леанід Юрык выказаў прапанову правесці трэнінг па прасоўванні, піяры і продажы сваіх матэрыялаў. Уладзімір Скрабатун заклікаў правесці экалагічную акцыю з пасадкай дрэў. Зміцер Лупач і Таццяна Смоткіна выказалі зацікаўленасць у правядзенні трэнінгу на эканамічную тэматыку.

Гучала шмат розных прапаноў пра тое, як святкаваць адметныя для журналістаў даты. Таксама глыбачане запланавалі сустрэчы з вядомымі блогерамі і журналістамі.

Пасля гэтага сябры Глыбоцкай суполкі ГА “БАЖ” пагаварылі пра важнасць журналісцкай салідарнасці, этыкі і ўзаемапавагі. Таццяна Смоткіна заклікала прысутных заўжды падтрымліваць калег, якія церпяць ціск і пераслед, а таксама прыйсці на суд да Змітра Лупача і падтрымаць яго. Суд адбудзецца ў Глыбокім 27 студзеня.

Напрыканцы карпаратыўнага мерапрыемства бажаўцы павіншавалі адзін аднаго з мінулымі святамі і Новым годам. Са святочнай праграмай да глыбачанаў завіталі іх сябры з Лепеля і зычылі ім шмат добрага.