Зміцер Лупач пачаў адбываць пакаранне арыштам, якое прызначыў яму Глыбоцкі раённы суд

Суддзя Андрэй Тарасевіч 11 мая пакараў Змітра Лупача арыштам за сустрэчу з блогерам Сяргеем Ціханоўскім, абвінаваціўшы ў парушэнні заканадаўства аб масавых мерапрыествах. Пасля суда журналісту стала дрэнна, і яго адвезлі ў лякарню, дактары выявілі хваробу сэрца. Па гэтай прычыне Змітру далі адтэрміноўку, міліцыянты нават узялі распіску, што ён сам прыдзе ў пастарунак у панядзелак 18 мая. Але 15 мая зранку Лупачу патэлефанавалі з міліцыі і сказалі, што неабходна явіцца для адбыцця пакарання ў пятніцу, так загадала міліцэйскае кіраўніцтва.

Зміцер Лупач паспеў падаць касацыйную скаргу на рашэнне Глыбоцкага райсуда ў Віцебскі абласны суд і наведаць цырульню. Але, кажа, прывесці ў парадак сацыяльныя сеткі не паспеў — спадзяваўся зрабіць гэта на выходных, ды ў гэтыя дні ўжо будзе ў ізалятары.

Паводле слоў журналіста, за час пераследу шмат людзей яму напісалі словы падтрымкі, і ён шчыра ўдзячны ўсім за салідарнасць і падтрымку.