З міліцыі журналістка Ларыса Шчыракова патрапіла ў шпіталь

«Мы развіталіся з Ларысай на праспекце Перамогі. Разам вялі з ёй стрым. Яна мелася паабедаць з сынам, а пасля ехаць дадому ў прыгарадны пасёлак Перамога», — расказвае калега і аператар Андрэй Толчын.

Як стала вядома, Шчыракову перастрэлі каля прыватнага дома людзі ў цывільным і адвезлі ў Гомельскі РАУС. Там ёй зрабілася блага. Шчыракову даставілі ў шпіталь інвалідаў вайны, які знаходзіцца непадалёк ад райаддзела міліцыі ў Навабеліцкім раёне Гомеля.

У шпіталі пацвердзілі, што Ларыса Шчыракова паступіла да іх у 21.40 мінулым вечарам і шпіталізаваная ў 1‑е неўралагічнае аддзяленне. Выконваючая абавязкі загадчыка аддзялення Ірына Любан паведаміла 31 жніўня карэспандэнту службы маніторынгу ГА «БАЖ», што Шчыракова скардзілася на галаўны боль, таму яе і шпіталізавалі.

«Пачувае сябе Шчыракова здавальняюча. Яна папрасілася дадому, напісала заяву, таму сёння яе выпісваем», — сказала лекар.

Мабільны тэлефон журналісткі пакуль недасяжны. Вядома, што супраць Ларысы Шчыраковай складзены пратакол паводле арт. 23.34 КаАП.