Заўтра працэс аб ліквідацыі БАЖ. Прыгадваем слаўную гісторыю нашай арганізацыі

Власти хотят ликвидировать Белорусскую ассоциацию журналистов (хроника, документы)

На сённяшні дзень Беларуская асацыяцыя журналістаў налічвае больш за 1300 сябраў, якія працуюць у розных перыядычных выданнях, на радыё і тэлебачанні, у выдавецкіх кампаніях. Прыгадваем кароткую гісторыю нашай супольнай арганізацыі.

Беларуская асацыяцыя журналістаў дзейнічае з восені 1995 года.

З 1997 г. БАЖ — сябра Міжнароднай Федэрацыі Журналістаў (IFJ).

У 2003 г. Сусветная асацыяцыя газет (WAN) узнагародзіла БАЖ «Залатым пяром свабоды» (Gold­en Pen of Free­dom prize).

У снежні 2004 г. Еўрапейскі парламент уганараваў БАЖ прэміяй імя Сахарава «За свабоду думкі».

У чэрвені 2011 г. Атлантычная Рада Злучаных Штатаў Амерыкі ўзнагародзіла БАЖ «Прэміяй Свабоды Атлантычнай Рады». Разам з журналісцкай арганізацыяй ёй былі ўганараваныя незарэгістраваны Праваабарончы Цэнтр «Вясна» і беларускі «Свабодны тэатр».

З 2013 г. БАЖ — поўны сябра Еўрапейскай Федэрацыі Журналістаў (EFJ).

З 1998 г. БАЖ стала вядзе маніторынг парушэнняў свабоды выказвання і правоў СМІ. У арганізацыі існуе сетка ўласных карэспандэнтаў па ўсёй Беларусі, якія аператыўна збіраюць і дасылаюць інфармацыю аб стане медыя ў сваім рэгіёне.

Падчас выбарчых кампаній у 2004, 2006, 2007, 2010, 2012, 2015, 2016, 2019 і 2020 гадах БАЖ вёў маніторынг асвятлення тэмы выбараў беларускімі СМІ. Журналісты ў Мінску і рэгіёнах рабілі колькасны і якасны аналіз публікацый і праграм у дзяржаўных і недзяржаўных СМІ, фіксуючы час, адведзены розным суб’ектам выбарчага працэсу, і адзначаючы манеру іх рэпрэзентацыі.

Усе 25 гадоў працы БАЖ займаўся абаронай правоў і законных інтарэсаў беларускіх журналістаў: гэта тысячы судовых працэсаў, юрыдычных кансультацый, нацыянальных і міжнародных кампаній у падтрымку калег.

Таксама ўсе гады БАЖ займаўся пажвышэннем прафесійных навыкаў калег: сотні трэнінгаў і навучальных курсаў па вельмі розных накірунках журналістыкі, круглыя сталы і канферэнцыі па найбольш вострых пытаннях жыцця медыясферы.

Ну і канешне ж БАЖ з’яўляецца ўнікальнай крыніцай інфармацыі пра сітуацыю ў сферы СМІ ў Беларусі. Гэтая інфармацыя змяшчаецца на сайце БАЖ, калегі з розных медыя і міжнародных арганізацый звяртаюцца ў БАЖ, калі ім патрэбна даведацца пра падзеі ў медыясферы ў Беларусі.

БАЖ — унікальная арганізацыя, якая 25 гадоў абараняла правы журналістаў у Беларусі. Мы ганарымся гэтым, ганарымся нашай супольнасцю і нашымі сябрамі.

Мы разам — Беларуская асацыяцыя журналістаў!