Пачаўся суд над Youtube-блогеркай Вольгай Такарчук

Пра пачатак працэсу паведамляе сайт Gazetaby.media.

Вольгу Такарчук судзяць за:

• актыўны ўдзел у дзеяньнях, што груба парушаюць грамадзкі парадак (арт. 342);

• паклёп (арт.188);

• абразу судзьдзі ў сувязі з ажыцьцяўленьнем ёю правасудзьдзя (арт.391).

Паводле сьледзтва, днём 30 жніўня 2020 году абвінавачаная брала ўдзел у «несанкцыянаваным масавым мерапрыемстве» ў Менску, «доўга і ўпарта парушала грамадзкі спакой, а пры знаходжаньні ў першых шэрагах масавага мерапрыемства ўзяла ўдзел у блякаваньні шляхоў транспартных камунікацый». Таксама яе абвінавачваюць ва ўдзеле ў акцыях 20 верасьня і 1 лістапада 2020 году.

Паводле Сьледчага камітэту, Вольга Такарчук разьмясьціла на Youtube ролік, «які зьмяшчае лжывыя зьвесткі, якія не адпавядаюць рэчаіснасьці, пра сацыяльнага пэдагога адной зь гімназій у Берасьцейскай вобласьці, абразы ў адрас судзьдзі суду Першамайскага раёну сталіцы».

Вольгу Такарчук затрымалі 19 траўня 2021 году. У яе двое непаўналетніх дзяцей — 3 і 7 гадоў.