Журналісту Дзянісу Івашыну перадалі некалькі віншавальных лістоў і паштовак

Раней ліставанне з ім перарвалася амаль на пяць месяцаў.

Івашын атрымаў лісты і паштоўкі з розных гарадоў і краінаў, напісана ў Тэлеграм-канале, які вядзе яго жонка Вольга. А таксама адна жыхарка Мінска даслала яму пасылку.

«З вядомых нам асабіста адрасантаў, Дзяніс атрымаў паштоўкі ад калегаў Глеба і Насты Рубанавых, якія дасылалі свае пасланне праз сэрвіс пісьмо.бел, а таксама ад каталіцкага святара Дзяніса з‑пад Мінска», — паведамляецца ў канале.

Сёння ж стала вядома, што Кастрычніцкі суд Гродна адхіліў скаргу на змяненне меры ўтрымання журналісту Дзянісу Івашыну.

Журналіст Дзяніс Івашын знаходзіцца за кратамі з 12 сакавіка 2021 года. Яго абвінавачваюць па двух артыкулах Крымінальнага кодэкса — «умяшанне ў дзейнасць супрацоўніка органаў унутраных спраў» (артыкул 365) і «здрада дзяржаве» (артыкул 356). Праваабарончая супольнасць Беларусі прызнала Дзяніса Івашына палітвязнем.