Маці Дар’і Чульцовай сустрэлася з дачкой у калоніі. «Усе лісты ідуць у печку»

Нагадаем: журналісткі Кацярына Андрэева і Дар’я Чульцова былі затрыманы 15 лістапада 2020 года пасля жывога эфіру з месца разгону сілавікамі дэманстрантаў — на сімвалічнай «плошчы Перамен».

Судом Фрунзенскага раёна Мінска яны былі прызнаны вінаватымі паводле ч.1 арт.342 Крымінальнага кодэкса (арганізацыя групавых дзеянняў, якія груба парушаюць парадак і звязаны з яўным непадпарадкаваннем патрабаванням прадстаўнікоў улады, што мела вынікам парушэнне працы транспарту, актыўны ўдзел у такіх дзеяннях) і прыгавораны да двух гадоў пазбаўлення волі ў калоніі агульнага рэжыму.

Зараз Дар’я Чульцова адбывае пакаранне ў жаночай калоніі №4 у Гомелі. У мінулыя выхадныя ёй дазволілі спатканне з маці, паведамяле «Народная Воля».

«Усім добрым людзям дачка перадае прывітанне, — распавяла Наталля, маці Дар’і. — Самаадчуванне ў яе добрае, выглядае гэтаксама. Стала зусім дарослай.

Да вызвалення засталіся чатыры месяцы, і ўсе мы разумеем, што яны будуць самымі складанымі.

Даша ў калоніі шмат чытае, зараз збіраецца перачытаць «Майстар і Маргарыта» Булгакава.

А вось лісты дачка не атрымлівае зусім. Усё ідзе ў печку!»

Журналістцы «Белсата» Кацярыне Андрэевай прад’явілі абвінавачванне ў здрадзе дзяржаве

Журналістцы «Белсата» Кацярыне Андрэевай прад’явілі абвінавачванне ў здрадзе дзяржаве  (ч.1 арт. 356 КК).

«Мы не ведаем, на аснове якіх падзеяў узнікла гэтае абвінавачванне. Справай займалася УКДБ па Гомельскай вобласці, следства праходзіла ва ўмовах поўнай сакрэтнасці — г.зн. аж да ўчорашняга дня, на працягу 55 сутак пасля яе пераводу ў СІЗА, сваякі не ведалі ні статус Каці, ні артыкулы па якім праводзяцца тыя самыя «працэсуальныя дзеянні». Пра сутнасць абвінавачання мы нічога не ведаем да гэтага часу і напэўна ніякай інфармацыі на гэты конт ужо не атрымаем — суд відавочна будзе закрытым», — сказаў Ігар Ільяш, муж Кацярыны, журналіст.

Кацярыне Андрэевай пагражае ад 7 да 15 гадоў пазбаўлення волі. Следства завершана, справа будзе перададзена ў пракуратуру. Магчыма, ужо ў маі адбудзецца судовы працэс.