«Менсктранс» далей судзіцца з палітзьняволеным Алегам Грузьдзіловічам

Агульная сума пазову за гэты эпізод — 23582 рублі 90 капеек. Канчатковае паседжаньне па эпізодзе прызначана на 9 жніўня на 12.00 гадзін, паведаміла Свабодзе жонка Алега Грузьдзіловіча Мар’яна.

«Пазоўніца назвала некалькіх людзей, якія ўжо чамусьці выплацілі вельмі маленькія сумы. Нават ёсьць 1 рубель з капейкамі, 10 рублёў і г.д., — распавяла Мар’яна Грузьдзіловіч. — Таксама судзьдзя Фралова зачытала, што Алег папярэджаны аб гэтым паседжаньні і, што ён паведаміў, што не прызнае сваёй віны, паколькі не перашкаджаў руху транспарту, а працаваў там як журналіст і ў яго было пасьведчаньне газэты „Народная Воля“».

Алег Грузьдзіловіч як журналіст асьвятляў акцыі пратэсту ў 2020 годзе, яго ж пакаралі як удзельніка паўтара гадамі зьняволеньня, а «Менсктранс» запатрабаваў ад яго кампэнсацыі за спынены рух транcпарту.

Агулам «Менсктранс» выставіў Алегу Грузьдзіловічу, які адбывае пакараньне ў Магілёўскай калёніі № 15, тры грамадзянскія пазовы —на агульную суму 56, 979 рублёў 68 капеек.

15 ліпеня ў Заводзкім раённым судзе «Менсктранс» фактычна адмовіўся ад часткі свайго грашовага патрабаваньня.

Наступнае паседжаньне, дзе разгледзяць яшчэ адзін пазоў «Менсктрансу» да Грузьдзіловіча, пройдзе ў Фрунзэнскім судзе Менску 25 ліпеня.

Перасьлед Алега Грузьдзіловіча

3 сакавіка 2022 году журналіста Свабоды асудзілі на паўтара года пазбаўленьня волі нібыта за арганізацыю масавых беспарадкаў і ўдзел у іх (артыкул 342, ч.1 КК) летам і ўвосень 2020 году. Нібыта Алег спыніў грамадзкі транспарт 16 жніўня на плошчы Незалежнасьці, 11 кастрычніка — на вуліцы Кальварыйскай, і 18 кастрычніка — на Партызанскім праспэкце.

Жонка Алега Грузьдзіловіча Мар’яна зьвяртала ўвагу на тое, што 16 жніўня, калі ў Менску адбылася самая шматлюдная акцыя, плошча Незалежнасьці яшчэ з 10‑й раніцы была агароджаная турнікетамі.

«Грамадзкі транспарт на праспэкце Незалежнасьці ў той дзень прэвэнтыўна быў спынены не дэманстрантамі, а менавіта гарадзкімі ўладамі. Алегу інкрымінуюць, што ён спыніў транспарт на цэлы дзень — з 10‑й да 20‑й гадзіны, а ён там знаходзіўся прыкладна а 16‑й гадзіне. Прычым на абсалютна законных падставах — як акрэдытаваны карэспандэнт Радыё Свабода».

Чытайце яшчэ:

Галоўрэд Сяргей Календа: «Для “Мінкульта” самая вялікая перспектыва, калі ў Беларусі ён будзе ў кожным шапіку»

Беларускі хельсінскі камітэт атрымаў кансультатыўны статус пры ЭКАСАС ААН

Журналіст па-за прафесияй: гамельчанка пачала ствараць відэалетапісы сем’яў