Журналіст, асуджаны за здымак для «Радыё Свабода», будзе адбываць пакаранне ў Віцебскай вобласці

Паводле звестак калег Юрыя Ганцарэвіча з баранавіцкага выдання Intex-Press, карэспандэнта этапавалі са следчага ізалятара ў папраўчую калонію №3 у гарадскім пасёлку Віцьба.

Юрый Ганцарэвіч быў асуджаны за фотаздымак расійскага ваеннага самалёта каля Баранавічаў у сакавіку 2022 года – на пачатку вайсковага ўварвання Расіі ва Украіну. Паводле абвінавачвання, журналіст увечары 2 сакавіка сфатаграфаваў самалёт і даслаў здымак ў чат-бот “Радыё Свабода”.

Нагадаем, пра затрыманне фотакарэспандэнта Intex-Press стала вядома з Telegram-канала сілавікоў, які распаўсюдзіў “пакаяльнае” відэа з ім. Пэўны час калегі не ведалі абставін затрымання. Пазней стала вядома, што Ганцарэвіча затрымалі 27 красавіка і спачатку арыштавалі паводле адміністратыўнага артыкула, а пакуль ён адбываў арышт, распачалі крымінальную справу. Журналіста абвінавацілі ў садзейнічанні экстрэмісцкай дзейнасці паводле артыкула 361–4 Крымінальнага кодэкса РБ.

Справу Юрыя Ганцарэвіча разглядаў Брэсцкі абласны суд. Пракурор Аляксей Ярошык запатрабаваў пакарання — 2 гады 6 месяцаў зняволення ў калоніі агульнага рэжыму. Менавіта такі вырак і агучыў 14 ліпеня 2022 года суддзя Мікалай Грыгаровіч.

Скарга ў Вярхоўны суд плёну не дала: 20 верасня 2022 года вырак быў пакінуты без зменаў.