Аператару Паўлу Падабеду прысудзілі 4 гады калоніі

Першапачаткова пасяджэнне 30 чэрвеня было запланавана на 15.00, пра што напярэдадні і сведчыла інфармацыя ў раскладзе на сайце Вярхоўнага суда. Аднак раптам час пасунулі на 10‑ю раніцы — яўная прыкмета, што здаць справу ў архіў вырашылі да доўгіх выходных.

Так і атрымалася: у першай палове прадстаўнік дзяржабвінавачання на падставе ч. 3 арт. 361–1 Крымінальнага кодэкса прапанаваў пакараць журналіста 4 гадамі папраўчай калоніі, а па абедзе суддзя Яўген Пісарэвіч прыняў прапанову без пярэчанняў. Сваякі і сам фігурант лічаць вырак празмерна строгім і не адпаведным інкрымінаваным «злачынствам».

Яшчэ раней Павел Падабед у лістах на волю пісаў, што ў выпадку неспрыяльнага для сябе рашэння будзе падаваць апеляцыйную скаргу ў Вярхоўны суд Беларусі.

З гледзішча абвінавачання, датычнасць Паўла Падабеда да злачынства («стварэнне экстрэмісцкага фармавання альбо ўдзел у ім») цалкам даказаная і патрабуе адпаведнага пакарання.

Пры гэтым улады працягваюць абіраць максімальныя санкцыі — нягледзячы на тое, што згаданы артыкул прадугледжвае ў тым ліку абмежаванне волі ва ўстанове адкрытага тыпу без накіравання ў калонію. 

Гэта азначае, што трэцяе па ліку і апошняе пасяджэнне стане простай фармальнасцю — у абсалютнай бальшыні палітычных спраў суддзі цалкам пагаджаюцца з патрабаваннем пракурорскіх работнікаў. Такім чынам, неўзабаве справа фрылансера можа скончыцца абвяшчэннем канчатковага прысуду.   

Падчас першага пасяджэння стала вядома, што Паўлу Падабеду інкрымінуецца супраца з тэлеканалам «Белсат» і, як вынік, «удзел у экстрэмісцкім фармаванні». У якасці персанальнай датычнасці дэманстраваліся відэасюжэты «пратэснага кантэнту», у тым ліку прысвечаныя знікламу відэааператару Дзмітрыю Завадскаму і забітаму журналісту Паўлу Шарамету. Хоць прозвішча фігуранта ў тытрах не значылася, паводле «ўскосных прыкмет» было агучана падазрэнне ў яго непасрэднай датычнасці да здымкаў.

Акрамя таго, у ходзе працэсу стала зразумела, што тэлефон Паўла Падабеда праслухоўваўся, гэтаксама сілавікі мелі доступ да ягонага ліставання ў месенджарах.  

Таксама журналіста абвінавацілі ў «карыслівых матывах» ад журналісцкай дзейнасці і атрыманні фінансавай выгады — падставай стала наяўнасць карткі замежнага банка. Не выключана, што на гэтай падставе падчас вынясення прысуду яму дадаткова выпішуць штраф за патэнцыйна нясплочаныя падаткі ў Беларусі.   

Сам Павел Падабед інкрымінаваныя «злачынствы» лічыць цалкам надуманымі.  

Чытайце яшчэ:

«Вялікую ролю грае матывацыя кандыдата». Рэдактары недзяржаўных медыя далі парады суіскальнікам працы

Жонка Дзяніса Івашына пра перавод мужа ў турму: Досыць дзіўна гэта ўсё выглядае

На брэсцкім дзяржаўным тэлебачанні ўзгадалі пра памілаванне Рамана Пратасевіча