Пуцін і Лукашэнка падпісалі дагавор аб стварэнні аб’яднанага медыяхолдынга Расіі і Беларусі
30 студзеня 2024
Пуцін і Лукашэнка дамовіліся стварыць медыякампанію Саюзнай дзяржавы. Адпаведную пастанову падпісалі на пасяджэнні Вышэйшага дзяржсавета Саюзнай дзяржавы ў панядзелак, 29 студзеня 2024 года, у Санкт-Пецярбургу. Пра гэта паведамляе РИА Новости.
Кіраўнік Мінлічбы РФ Максут Шадаеў заявіў, што зараз у медыяхолдынг будуць уваходзіць ужо існуючыя дзве штотыднёвыя газеты, штотыднёвы часопіс і тэлеканал, якія будуць забяспечваць «адзіную скаардынаваную палітыку».
Што гэта за выданні?
Згодна з сайтам парламенцкага сходу Саюза Беларусі і Расіі, у спіс СМІ Саюзнай дзяржавы ўваходзяць газета «Саюзнае Веча», газета «Саюз. Беларусь — Расія», часопіс «Саюзная дзяржава», тэлерадыёвяшчальная арганізацыя Саюзнай дзяржавы.
Шадаеў таксама адзначыў, што адначасова прапрацоўваецца пытанне «аб стварэнні медыяхолдынгу з нуля».
«Ідзе магутнае інфармацыйнае супрацьстаянне. Калі мы створым нармальны медыяхолдынг з улікам спроб і памылак — будзе добры холдынг, — пракаментаваў падзею Лукашэнка. — Людзі павінны ведаць, што адбываецца ў Беларусі, у Расіі. Тое, што існуе зараз, не зусім нас задавальняе».
Ідэя стварыць аб’яднаны медыяхолдынг Расіі і Беларусі з’явілася ў 2021 годзе: Лукашэнка прапанаваў «не размазваць грошы па газетах, часопісах, тэлеграм-каналах і юцьюбах, а сабраць іх у кулак і расказваць аб тым, што адбываецца».
Чытайце яшчэ:
Дзяржсакратар Саюзнай дзяржавы сцвярджае, што гатовы праект пастановы аб стварэнні адзінай медыякампаніі. Што з ёй не так?
Галоўнай рэдактаркай «Гродзенскай праўды» стала ідэолаг аблвыканкама
АНТ апублікаваў фэйкавы пост пра Ілана Маска з нецэнзурнай лаянкай
@bajmedia
