YouTube-канал «Брестской газеты» прызналі «экстрэмісцкімі матэрыяламі»

Чарговае папаўненне ў Рэспубліканскім спісе экстрэмісцкіх матэрыялаў закранула YouTube-канал #VideoBGLive, які належыць незалежнаму рэгіянальнаму інтэрнэт-выданню «Брестская газета». На сёння канал налічвае 387 тысяч падпісчыкаў.

Фота з архіву БАЖ

Як вынікае з дакумента на сайце Мінінфармацыі, рашэнне аб прызнанні YouTube-канала #VideoBGLive «экстрэмісцкімі інфармацыйнымі матэрыяламі» прыняў 28 сакавіка суддзя Іванаўскага раёна Андрэй Васілюк. Сам судовы працэс адбыўся паводле ініцыятывы мясцовай пракуратуры, а Міністэрства інфармацыі было пазначана ў якасці зацікаўленага боку.

Некалькі тыдняў таму, 14 сакавіка, суддзя Ленінскага раёна Брэста Андрэй Канючка прыняў аналагічнае рашэнне наконт Insta­gram-акаўнта «Брестской газеты» з назвай bg.live_365.

Напрыканцы 2021 года на патрабаванне пракуратуры Брэста кантэнт сайта «Брестской газеты» быў прызнаны судом «экстрэмісцкімі матэрыяламі». Пасля гэтага рашэннем Міністэрства інфармацыі інтэрнэт-рэсурс заблакавалі для карыстальнікаў з тэрыторыі Беларусі. Таксама «экстрэмісцкімі матэрыяламі» былі аб’яўленыя старонкі і групы «Брестской газеты» ў розных сацыяльных сетках.

28 лютага 2023 года Камітэт дзяржаўнай бяспекі Беларусі абвесціў «Брестскую газету» «экстрэмісцкім фарміраваннем», забараніўшы такім чынам дзейнасць у краіне праз пагрозу крымінальнага пераследу. А на пачатку 2024 года «экстрэмісцкай інфармацыйнай прадукцыяй» суд Ленінскага раёна Брэста палічыў і новы сайт «Брестской газеты» з адрасам bgmedia.site.

Супрацоўнікі рэдакцыі з прычыны бяспекі былі вымушаныя выехаць з Беларусі і зараз працуюць у эміграцыі.