У Telegram знайшлі невялікую, але небяспечную «дзіру», якой могуць скарыстацца сілавікі

Пры пераходзе па спасылках на Web.telegram.org з праграмы адбываецца аўтаматычны логін у акаўнт, чым могуць скарыстацца сілавікі. На праблему звярнулі ўвагу расейскія расследавальнікі і «Медиазона». «Белсат» праверыў, на момант публікацыі праблема не вырашаная.

Спасылка на старонку Web.telegram.org у мэсэнджары Telegram. Фота: Белсат

Тры расейскія журналісты заўважылі ў сябе ў мэсэнджары Telegram падазроныя сесіі з месцаў, дзе яны не знаходзіліся. IT-спецыяліст высунуў тэорыю аб тым, як хтосьці можа чытаць чужы Telegram.

Мэсэнджар Telegram працуе як асобная праграма для Win­dows, MacOS, Lin­ux, Android, iOS, існуюць неафіцыйныя праграмы для іншых платформаў. Таксама Telegram можа працаваць проста ў браўзеры праз Web-версію.

Менавіта праз апошнюю можа быць праблема. Справа ў тым, што пры пераходзе з афіцыйных кліентаў Telegram на тэлефонах і камп’ютарах па любой спасылцы на старонку гэтай версіі Web.telegram.org адбываецца аўтаматычны лагін у браўзеры. Увесці пароль, код ці нешта іншае пры тым не просяць (хоць Telegram і паведаміць карыстальніку пра новую сесію на ўсіх прыладах).

Калі ўвайсці ў Web-версію памылкова, гэта не праблема – можна і выйсці. Гэта можна ўспрымаць нават не «дзірой», а зручнай асаблівасцю.

Але, як заўважае «Медыязона», сілавікі пры «праверцы тэлефона» могуць адкрыць Telegram (калі затрыманы іх пусціць у мэсэнджар ці не абароніць сваю прыладу паролямі) і атрымаць поўны і неабмежаваны доступ да перапіскі карыстальніка ў сваім браўзеры. Акрамя таго, сесію браўзера могуць скапіяваць праз функцыю «USB Debug­ging», калі такая была раней уключаная карыстальнікам у надалах тэлефона.

Абараніцца ад гэтага загадзя нельга, але пасля траплення тэлефона ў рукі сілавікоў можна зайсці ў налады Telegram, у раздзеле «Прыватнасць і бяспека» паглядзець на «Актыўныя сесіі» і спыніць непажаданыя або ўсе адразу.