Каталіцкае «Радыё Марыя» пераехала ў сінагогу
10 чэрвеня 2024
Каталіцкае «Радыё Марыя» знайшло новае часовае памяшканне для працы. Зараз супрацоўнікі рэдакцыі займаюцца яго абсталяваннем. На гэта накіраваны сабраныя ахвяраванні, паведамляе сайт katolik.life.
Фота: katolik.life
Нагадаем, рэдакцыі давялося з’ехаць з арэнднага памяшкання, дзе каманда працавала восем гадоў, з‑за таго, што будынак прадалі новаму ўласніку. Пераезд быў тэрміновым — гаспадары пачалі рамонт раней запланаванага тэрміну.
Знайсці новае, пакуль часовае памяшканне дапамог выпадак. Удзельнікі каманды заўважылі абвестку аб арэндзе памяшкання ў адной з сінагог Мінска. Вырашылі патэлефанаваць – там не толькі не адмовілі, але і былі рады, даведаўшыся, што памяшканне патрэбна каталіцкаму медыя. Дамову замацавалі пячаткамі з выявамі Марыі і юдэйскай міноры.
Зараз у супрацоўнікаў радыё шмат працы: трэба не толькі пераабсталяваць пакоі пад студыю, але і замяніць старую праводку, падрыхтаваць праект гукаізаляцыйных работ. На гэта накіраваны ахвяраванні, якія сабралі беларусы пасля таго, як стала вядома пра высяленне рэдакцыі.
Зараз збор працягваецца, бо наперадзе шмат выдаткаў. Жадаючыя могуць падтрымаць «Радыё Марыя» (толькі з тэрыторыі Беларусі – дапамогу з‑за мяжы арганізацыя прымаць не можа) і пералічыць ахвяраванне любым спосабам, апісаным на афіцыйнай старонцы радыё.
@bajmedia
Журналістку Алену Шабуню судзілі па двух адміністрацыйных артыкулах. Пра суд ёй нават не паведамілі
19.02.2024
У «Прэсбола» з’явіўся новы галоўны рэдактар
22.12.2023
Выйшаў на волю бабруйскі блогер Андрэй Бяляўскі. Яму павязалі іранічную стужку выпускніка
08.01.2024
«Святога нічога». У беларускай медыяпрасторы з’явіўся новы гумарыстычны падкаст
12.01.2024
