Беларускі журналіст Андрэй Мялешка, якога не ўпусцілі ў Грузію, прыляцеў у Варшаву

Журналіст Андрэй Мялешка прыляцеў у Варшаву а 3:30 раніцы 17 верасня. Перад гэтым ён амаль суткі правёў у аэрапорце ў Кутаісі — увесь гэты часа яго разам з 11-гадовай дачкой трымалі ў адмысловым пакоі для тых, каго дэпартуюць.

Андрэй Мялешка ў самалёце на Варшаву. 17 верасня 2024 года. Фота: Алесь Ляўчук

На працягу некалькіх гадзін з Андрэем Мялешкам не было ніякай сувязі. У яго і дачкі адабралі тэлефоны і вярнулі толькі пасля пасадкі ў самалёт. Вылет самалёта да Варшавы 16 верасня, на якім журналіста мусілі дэпартаваць, тым часам адкладаўся чатыры разы. Урэшце ён вылецеў у 01:21 наступнага дня замест 15:40 па раскладзе.

Пашпартоў пры пасадцы на борт у Андрэя і ягонай дачкі на руках не было — экіпаж аддаў іх ужо пазней, у самалёце. Пашпарты ў беларусаў забралі адразу пры затрыманні і адмове ўезду. Калі Андрэй з дачкой папрасілі ў Грузіі міжнародную абарону, ім адмовілі, бо нібыта ў іх не было пашпартоў. Праваабаронцы кажуць, што гэта — парушэнне правоў.

Андрэю Мялешку так і не патлумачылі, чаму яму і дачцы адмовілі ва ўездзе ў Грузію, дзе яны пражылі тры гады. Журналіст пытаўся, але супрацоўнікі казалі яму, што не маюць права распавядаць. Як нам стала вядома, пакуль беларусы чакалі дэпартацыю, ім прыносілі каву і гарбату, увечары выводзілі з пакою, каб яны маглі штосьці з’есці.

За дзяўчынкай з Батумі прыязджала ейная маці, жонка Андрэя, аднак дачку жанчыне не аддалі і не дазволілі ім сустрэцца. Жонка журналіста засталася ў Батумі разам з малодшай дачкой.