Пракуратура Мінска адсправаздачылася пра «супрацьдзеянне экстрэмізму»

Мінская гарадская пракуратура са студзеня па жнівень 2024 года накіравала ў суды 103 заявы аб прызнанні шэрагу інтэрнэт-рэсурсаў «экстрэмісцкай інфармацыйнай прадукцыяй».

Пракуратура Мінска. Фота: https://www.facebook.com/prokuraturaminsk/

Паводле паведамлення на сайце Генпракуратуры Беларусі, на падставе такіх заяў «экстрэмісцкімі» матэрыяламі былі прызнаныя: 6 інтэрнэт-сайтаў, 13 Telegram-чатаў і Telegram-каналаў, 10  старонак у Insta­gram, 24 старонак у Tik­Tok, 14 каналаў у відэахостынгу YouTube, 11 акаўнтаў у Face­book, 3 друкаваныя выданні (кнігі), а таксама 44 акаўнты ў сацыяльнай сетцы X (Twit­ter). 

Пракуратура даводзіць, што ўсе гэтыя рэсурсы займаліся размяшчэннем матэрыялаў, «арыентаваных на павышэнне сацыяльнай напружанасці ў грамадстве і стварэнне недаверу да прадстаўнікоў дзяржаўнай улады».

У якасці прыкладаў згадваюцца акаўнты ў Х з назвамі «Arty­om Shraib­man», «Valery Tsep­ka­lo», «Pavel Latush­ka» і «Free Belarus», а таксама акаўнты ў Tik­Tok з назвамі «prezident.sveta», «Змагарка Алеся», «Міхаіл».

Відавочна, што ў верасні сталічная пракуратура працягвае тую ж практыку: накіроўвае ў суды прадстаўленні, што да прызнання пэўных інтэрнэт-рэсурсаў «экстрэмісцкімі». Прычым асаблівую ўвагу звяртае менавіта на прыватныя старонкі ў сацыяльных сетках.

Так, у гэтым месяцы «экстрэмісцкай інфармацыйнай прадукцыяй» былі прызнаныя  акаўнты ў Х з назвамі «Vik­to­ryia Fio­dar­a­va», «Ксюшанька», «Хлопец у шортах», «Ser», YouTube-канал «Максим Шабуцкий»,  цэлы шэраг персанальных старонак блогеркі Вольгі Такарчук і Таццяны Хоміч, роднай сястры палітзняволенай Марыі Калеснікавай.