Папаўненне «экстрэмісцкага» спіса Мінінфарма: сацсеткі беларускіх службаў «Радыё Свабода» і Польскага радыё, відэаканала «Жизнь-малина» і іншыя рэсурсы

Міністэрства інфармацыі Беларусі 11 кастрычніка абнавіла Рэспубліканскі спіс інфармацыйнай прадукцыі. У яго дададзеныя інтэрнэт-рэсурсы, што былі прызнаныя беларускімі судамі «экстрэмісцкай інфармацыйнай прадукцыяй» на працягу апошняга тыдня.

«Экстрэмісцкім» прызнаны кантэнт групы «Беларуская служба Польскага радыё» ў  Face­book (ідэнтыфікатар facebook.com/radyjo). Рашэнне пра гэта 4 кастрычніка прыняў суд Браслаўскага раёна Віцебскай вобласці.

4 кастрычніка суд Маладзечненскага раёна Мінскай вобласці прызнаў «экстрэмісцкай» старонку ў Insta­gram беларускай журналісткі, былой палітзняволенай Вольгі Класкоўскай. Акаўнт мае назву «vol­hak­lask­ouskaya» і ідэнтыфікатар instagram.com/volhaklaskouskaya.

У той самы дзень суд Маладзечненскага раёна абвесціў забароненай таксама старонку ў Insta­gram з назвай «lichtar_by» і ідэнтыфікатарам instagram.com/lichtar_by, створаную беларускімі студэнтамі факультэта палітычных навук і журналістыкі Познаньскага ўніверсітэта (Польшча).

Суд Партызанскага раёна Мінска 4 кастрычніка прызнаў «экстрэмісцкай інфармацыйнай прадукцыяй»  сайт abfby.org  і старонкі ў сацсетках няўрадавай арганізацыі «Актыўнымі быць файна».

8 кастрычніка суд Валожынскага раёна Мінскай вобласці пастанавіў лічыць «экстрэмісцкім» змест YouTube-акаўнта «Жизнь-малинка» (ідэнтыфікатар @malina_shorts). Гэтая спасылка вядзе на відэаканал «Жизнь-малина» блогера Мікіты Мелказёрава.

8 кастрычніка суд Чашніцкага раёна Віцебскай вобласці прызнаў «экстрэмісцкай інфармацыйнай прадукцыяй» кантэнт групы «Свабода АRT ǀ Беларусь»  (ідэнтыфікатар vk.com/svaboda_art) у сацыяльнай сетцы «ВКонтакте». Група мае 18 тысяч падпісчыкаў, яна з’яўляецца адным з праектаў беларускай службы «Радыё Свабода».