У Гродне бацькам школьнікаў пагражаюць пастаноўкай на ўлік за падпіску на папуляныя гарадскія сайты

У чатах гродзенскіх школ і гімназій пагражаюць пастаноўкай на ўлік сямей у сацыяльна небяспечным становішчы, калі бацькоў прыцягнуць за распаўсюд экстрэмісцкіх матэрыялаў. Гэта адбываецца на фоне распаўсюджвання інфармацыі пра прызнанне экстрэмісцкімі матэрыяламі папулярных гарадскіх навінавых сайтаў — s13.ru і autogrodno.by, піша Hrodna.life.

Ілюстрацыйнае фота Hrodna.life

Па інфармацыі Hrodna.life, у чатах з’явілася паведамленне, у якім кажуць пра прызнанне экстрэмісцкімі матэрыяламі папулярных гарадскіх навінавых парталаў s13.ru і autogrodno.by. Бацькам раяць адпісацца ад рэсурсаў і прыбраць лайкі. Таксама паведамляецца, што ў выпадку прыцягнення па артыкуле 19.11 КаАП (распаўсюд экстрэмісцкай інфармацыйнай прадукцыі) школа або гімназія будуць праводзіць сацыяльнае расследаванне, па выніках якога дзіця могуць прызнаць змешчаным у сацыяльна небяспечнае становішча.

Гродзенскі сайт s13.ru і яго сацсеткі перасталі абнаўляцца з серады 23 кастрычніка, заўважыў Telegram-канал «Право имеют». Інфармацыя пра прызнанне яго экстрэмісцкім з’явілася 25 кастрычніка у гарадскіх чатах. Працадаўцы, участковыя, прадстаўнікі ўладаў раілі адпісацца ад сацсетак партала. Да вечара дзяржСМІ паведамілі, што па заяве пракурора горада Гродна матэрыялы інтэрнэт-рэсурсу s13 сапраўды прызнаныя судом экстрэмісцкімі. 

Таксама стала вядома пра адміністрацыйны працэс над уладальнікам сайта s13.ru Сяргеем Чабоцькам. Справу па артыкуле 19.11 ч. 2 КаАП разгледзелі 25 кастрычніка ў судзе Ленінскага раёна Гродна. Вынік пакуль невядомы.

Сайт s13.ru — адзін з самых буйных на гродзенскім медыярынку, працуе амаль 20 гадоў. У рубрыцы «Папулярнае» тэксты збіралі па 20−100 тыс. праглядаў. У Insta­gram у іх было 82 тысячы падпісчыкаў, у Telegram — 14 тысяч. Пасля выбараў 2020 года s13 перастаў перадрукоўваць медыі, прызнаныя экстрэмісцкімі, і часам бяскрытычна рэпосціў праўладныя і дзяржаўныя тэксты. За двое сутак пасля прызнання экстрэмісцкімі матэрыяламі страціў дзясяткі тысяч падпісчыкаў у сацсетках.

Партал пра аўтанавіны Гродна — Autogrodno.by ніяк не каментуе чуткі пра прызнанне яго экстрэмісцкім, рэгулярна абнаўляецца і не прысутнічае ў Рэспубліканскім спісе экстрэмісцкіх матэрыялаў. Праўда, s13.ru там таксама пакуль няма. Магчыма, спіс абновіцца ў панядзелак.