У Мексіцы застрэлілі журналіста адразу пасля жывога эфіру

Гэта першае забойства журналіста за час знаходжання на пасадзе новай прэзідэнткі Мексікі. Міжнародныя арганізацыі заклікаюць забяспечыць бяспеку супрацоўнікаў СМІ.

Маўрысіа Круз Соліс. Крыніца фота: detector.media

У Мексіцы застрэлілі журналіста і радыёвядучага Маўрысіа Круса Соліса. Пра гэта паведамляе Детектор Медіа са спасылкай на CBS News.

Забойства адбылося ў аўторак, 29 кастрычніка, у горадзе Уруапан у заходнім штаце Мічаакан.

25-гадовы Маўрысіа Круз Соліс быў вядучым на мясцовай радыёстанцыі La Poderosa Uru­a­pan і заснавальнікам і дырэктарам навінавага сайта Min­u­to x Min­u­to. Ён распавядаў пра агульныя навіны, у тым ліку пра палітыку і бяспеку.

Паводле афіцыйных звестак, забойства адбылося праз некалькі хвілін пасля таго, як журналіст выпусціў у сацсетках прамую трансляцыю інтэрв’ю з мэрам горада Карласам Мансо. У выніку нападу яшчэ адзін чалавек быў паранены.

Генеральная пракуратура штата Мічаакан распачала расследаванне па гэтай справе. Асоба нападніка на журналіста пакуль не ўстаноўлена.

Міжнародная арганізацыя «Рэпарцёры без межаў» (RSF) асудзіла забойства Соліса і заклікала новую прэзідэнтку Мексікі Клаўдзію Шэйнбаўм прыняць неадкладныя канкрэтныя меры для забеспячэння бяспекі журналістаў у краіне.

«Калі мексіканскія ўлады дазволяць гэтаму злачынству застацца беспакараным, гэта будзе сумным напамінам пра тое, што змена ўрада не прынесла бяспекі прэсе ў краіне», — сказаў Ян-Альберт Гутсэн, мексіканскі прадстаўнік Камітэта абароны журналістаў (CPJ).

Гэта першае забойства журналіста за час паўнамоцтваў новага прэзідэнта Клаўдзіі Шэйнбаўм, якая ўступіла на пасаду 1 кастрычніка 2024 года.

Мексіка лічыцца адной з самых небяспечных краін для прадстаўнікоў медыяў. Па дадзеных RSF, з 1994 года тут было забіта больш за 150 журналістаў.

У гэтым годзе 18 кастрычніка ўзброеныя людзі абстралялі фасад офіса газеты El Debate ў Кульякане, сталіцы штата Сіналоа. Рэгіён лічыцца аплотам аднаго з найбуйнейшых наркакартэляў.

У жніўні невядомыя застрэлілі мексіканскага крымінальнага журналіста Алехандра Марцінеса. Ён знаходзіўся пад аховай паліцыі пасля таго, як перажыў замах у 2022 годзе.