«Экстрэмісцкі спіс» Мінінфарма: Petitions.by, Telegram-канал «ГУРНЕВIЧ» і некалькі TikTok-акаўнтаў

Міністэрства інфармацыі 9 студзеня папоўніла Рэспубліканскі спіс экстрэмісцкіх матэрыялаў. У яго дадалі інфармацыйныя рэсурсы, прызнаныя «экстрэмісцкімі» ў канцы мінулага і ў першыя дні 2025 года.

Фота: Fer­nan­do Arcos / pexels.com

3 студзеня 2025 года суд Партызанскага раёна Мінска абвесціў «экстрэмісцкай інфармацыйнай прадукцыяй» Telegram-канал «ГУРНЕВIЧ» (ідэнтыфікатар   t.me/dhurnievic). Канал мае больш за тысячу падпісчыкаў.

30 снежня суд Цэнтральнага раёна Мінска пастанавіў лічыць «экстрэмісцкай інфармацыйнай прадукцыяй» кантэнт сайта Petitions.by і «яго аналагі на іншых платформах», як напісана ў дакуменце на сайце Мінінфарма. Да іх суд аднёс

• старонкі ў сацсетках Insta­gram (ідэнтыфікатар instagram.com/petitions.by?igsh=NTc4MTIwNjQ2YQ==),
• Face­book (ідэнтыфікатар facebook.com/petitionsby), Х (ідэнтыфікатар x.com/petitions_by),
• Telegram-канал з ідэнтыфікатарам t.me/petitions_by,
• Telegram-чат «Клуб Комментаторов Petitions.by».

30 снежня суд Лідскага раёна Гродзенскай вобласці залічыў у экстрэмісцкія рэсурсы Tik­Tok-акаўнт «this_is_hrodna» (ідэнтыфікатар tiktok.com/@this_is_hrodna). Гэта відэаканал рэгіянальных навін, які і раней прызнавалі «экстрэмісцкім», але тады ён меў іншую назву.

Той самы суд 30 снежня прызнаў «экстрэмісцкай інфармацыйнай прадукцыяй» і Tik­Tok-акаўнт «belsat¬_l» з ідэнтыфікатарам tiktok.com/@belsat-_l. А таксама лагатып акаўнта, які, паводле апісання на сайце ведамства, уяўляе сабой геаметрычную кампазіцыю з ромбаў чорнага і белага колераў.

«Варта адзначыць, што менавіта ў такім напісанні ў «Белсата» няма акаўнта. Магчыма, гаворка вядзецца пра belsat_l, але ў спісе Мінінфармацыі адрозніваецца і прадстаўленая ўладамі спасылка», — тлумачыць belsat.eu.