Памёр фотакарэспандэнт з Брэстчыны Аляксей Ганчук

Журналіст, фатограф і паэт Аляксей Ганчук памёр 9 студзеня 2025 года. Праз тыдзень яму споўніўся б 71 год. Сумную навіну пра сябра БАЖ паведаміла «Суполка беларускіх пісьменнікаў». 

Аляксей Ганчук

Аляксей Іванавіч нарадзіўся 17 студзеня 1954 года ў вёсцы Навасёлкі Кобрынскага раёна Брэсцкай вобласці. Закончыў Тэвельскую пачатковую школу, затым працягнуў вучобу ў Стрыгаўскай сярэдняй школе, якая знаходзілася ў сямі кіламетрах ад дома.

Яшчэ ў дзяцінстве Аляксея захапіла фатаграфія. Першыя ўрокі ён браў у мясцовага  фатографа-аматара.

Пасля дзевяці класаў яны з братам Дзмітрыем уладкаваліся ў ПМК грузчыкамі. Атрымаўшы першы ў жыцці заробак, хлопчык купіў фотаапарат «Змена».

Падчас службы ў арміі, якую спадар Ганчук праходзіў у Мінску, хлопец скончыў школу ваенных карэспандэнтаў пры Доме афіцэраў. 

Вярнуўшыся з арміі дадому, знайшоў працу фатографам на камбінаце бытавога абслугоўвання ў Жабінцы. З 1982 года пачалася яго журналісцкая кар’ера: Аляксей прыйшоў на пасаду карэспандэнта жабінкаўскай раённай газеты «Сельская праўда». Працуючы ў раёнцы, пачаў пісаць вершы на роднай мове.

Яшчэ Аляксей Іванавіч быў фотакарэспандэнтам маларыцкай раёнкі «Голас часу», абласной газеты «Народная трыбуна», абласной газеты «Бресцкі веснік», фатографам, карэспандэнтам і фотакарэспандэнтам рэгіянальных газет.

У 1990‑м спадар Ганчук скончыў кінафотафакультэт Маскоўскага завочнага народнага ўніверсітэта мастацтваў.

За дзесяцігоддзі ў фотажурналістыцы Аляксей Іванавіч правёў шматлікія персанальныя фотавыставы, удзельнічаў у абласных і рэспубліканскіх фотаконкурсах, дзе неаднаразова атрымліваў дыпломы. Яго прызнавалі лепшым фотакарэспандэнтам Брэсцкай вобласці за 2013 і 2015 гады.

Аляксея Ганчука пахавалі ў Жабінцы.