Кітайскі чат-бот DeepSeek стаў канкурэнтам ChatGPT, але для медыяў ён можа быць небяспечным

Стартап DeepSeek з Кітая выпусціў мадэль штучнага інтэлекту, якую ўжо назвалі «забойцай Chat­G­PT». Яна можа перасягнуць па параметрах амерыканскія аналагі, пры гэтым з’яўляецца таннейшай за іх.

Прыкладанні Deepseek і Chat­G­PT. Фота: Reuters

З’яўленне кітайскага чат-бота ужо выклікала глабальны абвал на IT-рынку. Больш за ўсіх пацярпела яшчэ нядаўна самая дарагая кампанія ў свеце Nvidia, піша Reuters. 

Так, усяго за адзін дзень кошт акцый Nvidia на амерыканскай тэхналагічнай біржы NASDAQ упаў больш чым на 17%. У выніку кампанія перастала быць самай дарагой у свеце, прапусціўшы наперад Apple і Microsoft.

Напярэдадні абвалу акцый Nvidia новы кітайскі чат-бот DeepSeek абагнаў Chat GPT па загрузках у App­Store. Гэта адбылося пасля таго, як DeepSeek прадставіў абноўленую мадэль ШІ. Па словах стваральнікаў, яна пераўзыходзіць Chat­G­PT па ўсіх асноўных параметрах.

Спецыялісты адзначаюць, што DeepSeek, у адрозненні ад Chat­G­PT, дае абгрунтаванне сваіх адказаў на запыты карыстальніка. Акрамя таго, кітайскі чат-бот мае просты інтэрфейс і зручныя мабільныя прыкладанні. Пры гэтым паведамляецца, што выдаткі на яго распрацоўку аказаліся значна ніжэйшымі, чым на стварэнне Chat­G­PT. 

Аднак у новага чат-бота ёсць і мінусы. На іх звяртае ўвагу аўтар тэлеграм-канала пра ШІ ў медыях Easy AI Дзмітрый Смірноў, які ўжо пратэставаў DeepSeek.

Напрыклад, у апошні тыдзень кітайскі чат-бот пачаў падтарможваць — верагодна, з‑за вялікага наплыву карыстальнікаў. Пакуль што ў ім няма магчымасці генераваць карцінкі. Рэжым «пошуку ў інтэрнэце» часам падвісае, а без яго веды мадэлі абмежаваныя канцом 2023 года. Здараюцца і галюцынацыі.

Чат-бот, як звяртае ўвагу Дзмітрый Смірноў, збірае інфармацыю, якую загружаюць карыстальнікі, і захоўвае яе «на надзейных кітайскіх серверах». Аднак галоўная небяспека, паводле спецыяліста, складаецца ў тым, што кітайская мадэль ШІ цэнзуруе адказы. Напрыклад тыя, што тычацца кітайскай гісторыі і палітыкі.

«Як я зразумеў са свайго досведу, цэнзуры амаль няма, калі задаеш пытанні на рускай мове, але шмат, калі на англійскай. Але тым не менш яна тут ёсць і незразумела, што зацэнзуравана яшчэ апроч «кітайскіх пытанняў», — піша Дзмітрый Смірноў.

Цэнзура — гэта вельмі дрэнны паказчык, таму такі чат-бот не можа быць працоўным інструментам для рэдакцый СМІ, робіць вывад спецыяліст.