Бізнэсмен Ізраілевіч гатовы адклікаць пазоў да «Новага Часу», але пры адной умове. Дадаўся каментар рэдактаркі «Новага Часу»

Першае судовае паседжанне, праўда, ні да чаго не прывяло — сам Ізраілевіч на яго не прыйшоў, а суд пастанавіў «удакладніць патрабаванні да газеты».

Як заявіў сам Ізраілевіч у каментарыі «Нашай Ніве», ён перагледзеў сітуацыю і гатовы адклікаць пазоў. 

«Мяне не цікавяць тыя грошы, я не хачу забіраць іх у незалежнай прэсы. Я ўвогуле паважаю незалежную прэсу — заўсёды павінен быць адлюстраваны іншы погляд. Я таксама звярну ўвагу, што пра Курапаты я ніводнага кепскага слова не сказаў, я толькі назваў швондзерамі тых, хто кідаецца пад машыны і лаецца пры дзецях. Я таксама выбачыўся перад Анісім [дэпутатку Алену Анісім ён палічыў гаспадаром газеты «Новы час» — Рэд].

А што да газеты… Ну вось Івашын [журналіст Дзяніс Івашын — аўтар цыкла расследаванняў пра рэстаран у Курапатах — Рэд.]— ён бачыць, што я катэгарычна не згодны з яго першай публікацыяй, а потым не каб пазваніць мне! Выпускае яшчэ чатыры і ў судзе абяцае пятую! Гэта нармальна? Калі б ён са мной пагаварыў, то я б дакументамі разбіў яго сцверджанні.

Таму я прапаную наступнае: разабрацца да 10 верасня з юрыстамі. Вось сядаю я са сваім і газета са сваім, давайце яшчэ побач пасадзім пару журналістаў: «Нашу Ніву», «Тутбай», «Свабоду». І па кожным пункце праверым.

Калі там напісана праўда, то я ў гэтым публічна прызнаюся, калі не, то маё патрабаванне простае: «Новы Час» напіша, што іх журналіст Івашын надрукаваў неправераную інфармацыю, вось і ўсё».

Аднак рэдактарка «Новага Часу» Аксана Колб катэгарычна не згодная з такой прапановай. Спадарыня Колб патлумачыла сваю пазіцыю сайту baj.by:

«Персанальна да нас Ізраілевіч не звяртаўся. Я не збіраюся сустракацца з ім і нешта так вырашаць, толькі праз суд. Яшчэ ў мінулы чацвер падчас нашай сустрэчы ён заяўляў, што гэты канфлікт будзе вырашаць толькі суд. Вось цяпер і мы згодныя толькі на суд. Учора ў судзе з’явіліся два слізкія моманты: суд запрасіў даведку з ФСЗН аб працаўладкаванні Мартынава, а таксама былі прадстаўленыя доказы позоўніка аб — раздрукоўкі каментароў невядома адкуль.

Калі ў пазасудовым парадку вырашаць канфлікт, то наша прапанова застаецца ранейшай: я бяру ў Ізраілевіча інтэв’ю, мы публікуем гэты артыкул, то бок апублічваем яго пазіцыю. Кожны з нас сплочвае свае судовы выдаткі. І я нават прабачаю абвінавачванне ў антысемітызме. Але, калі падзеі будуць развівацца так імкліва, то пакідаю за сабой права звярнуцца ў міліцыю з заяваю з гэтай нагоды».

Абнаўленне: Каля 15‑й гадзіны Ізраілевіч звязаўся з рэдактаркай Колб.