Блогер Vadimati распавёў пра арышт кватэры ў Гродне

Былы палітзняволены блогер з Гродна Вадзім Ермашук распавёў пра арышт сваёй маёмасці  ў сторыс на старонцы Insta­gram.

Блогер Вадзім Ермашук (Vadi­mati). Фота: Сяргей Людкевіч / Hrodna.life

Вадзім Ермашук апублікаваў апавяшчэнне ад Упраўлення Следчага камітэта па Гродзенскай вобласці. У ім паведамляецца, што на кватэру блогера ў Гродне 14 студзеня 2025 года быў накладзены арышт. Вядома, што гэта адбылося на падставе пастановы следчага. Пра прычыны арышту ў дакуменце не ўзгадваецца.

«Не ведаю нават за што. Да санкцый не прызываў, расказваў толькі ўсю жэсць, што адбывалася са мной», — пракаментаваў блогер.

Вадзім Ермашук (Vadi­mati) — былы палітвязень. Яго затрымалі ў жніўні 2021 года ў Шчучыне, куды блогер паехаў здымаць ролік. Пасля 40 сутак адміністрацыйнага арышту на яго завялі дзве крымінальныя справы — паводле артыкула 368 Крымінальнага кодэкса (абраза Лукашэнкі) і артыкула 370 Крымінальнага кодэкса (здзек з дзяржаўных сімвалаў).

У судзе Ермашук не прызнаў віну ні па адному з артыкулаў і адмовіўся даваць паказанні. 21 снежня 2021 года суд Шчучынскага раёна Гродзенскай вобласці прыгаварыў гродзенца да трох гадоў калоніі агульнага рэжыму (суддзя Дзмітрый Цівунчык). 

«Я нес двойное наказание — политическое и человеческое». Блогер Vadimati рассказал о низком статусе и прессинге в колонии

Блогер выйшаў на волю 26 чэрвеня 2024 года, адбыўшы поўны тэрмін пакарання. У хуткім часе пасля вызвалення Вадзім паведаміў, што пасля калоніі ў яго выявілі злаякасную меланому. Ермашук перанёс аперацыю па яе выдалені.

1 снежня 2024 года ягоную старонку ў Insta­gram прызналі «экстрэмісцкімі матэрыяламі», пасля чаго блогер з’ехаў з краіны.

Зараз BYSOL адкрыў збор для Вадзіма Ермашука, каб ён мог аднавіцца пасля турмы і хвароб. Грошы патрэбныя на жыллё і медыцынскія выдаткі. Падтрымаць блогера можна тут.