Блогера Сяргея Ціханоўскага вызвалілі з ізалятара

“Мне патлумачылі, што з суда Савецкага раёна ў ізалятар не паступіла пастанова наконт майго паўторнага пакарання 15-суткамі  адміністрацыйнага арышту”, — паведаміў  Ціханоўскі.

10 студзеня суддзя Савецкага раёна Аляксандр Мохараў пакараў блогера Сяргея Ціханоўскага чарговымі 15-суткамі адміністрацыйнага арышту за  “актыўны ўдзел”у несанкцыянаваным мітынгу супраць паглыблення інтэграцыі з Расіяй20 снежня ў Мінску. Паводле пісьмовага сведчання сталічных міліцыянтаў, якія суддзя Мохараў зачытаў у судзе, Ціханоўскі на Кастрычніцкай плошчы ў сталіцы размахваў сцягам і выкрыкваў лозунг“Жыве Беларусь!”.

Сам блогер патлумачыў, што сцягам не размахваў, лозунгаў не выкрыкваў, а  толькі здымаў на відэа мітынг, каб “людзі даведаліся праўду”, бо “дзяржаўныя тэлеканалы не паказвалі мітынг”.

Аднак суддзя не ўзяў пад увагу тлумачэнні блогера і адмераў яму на падставе артыкула 23.34 КаАП (за удзел у несанкцыянаваным масавым мерапрыемстве) максімальна жорсткае пакаранне— 15 сутак арышту.

З суда міліцыя вярнула блогера Ціханоўскага ў ізалятар даседжваць папярэдні 15-суткавы арышт, а сёння адпусціла на волю, спаслаўшыся на адсутнасць новай судовай пастановы.

Першапачаткова Сяргея Ціханоўскага супрацоўнікі Жлобінскай ДАІ  затрымалі раніцай 27 снежня, калі ён ехаў у Мінск, дзе планаваў рабіць здымкі для свайго YouTube-канала“Страна для жизни”. Дарожныя інспектары заявілі, што аўтамабіль, на якім ехаў блогер, аб’яўленыў вышук.Ціханоўскага даставілі ў суд Савецкага раёна Гомеля, дзе пакаралі першым арыштам за прысутнасць на антыінтэграцыйнай акцыі пратэсту ў абарону незалежнасці Беларусі.