Брэсцкі абласны суд адхіліў скаргі журналіста Яўгена Скрабца

Першая касацыйная скарга была на рашэнне суда Ленінскага раёна Брэста, калі суддзя Аляксандр Семянчук пакараў Яўгена Скрабца штрафам у памеры 30 базавых велічынь (765 рублёў) за артыкул на сайце “Радыё Рацыя” пра выставу ў Брэсцкім абласным краязнаўчым музеі.

Другая судовая справа тычылася падзей каля пабудаванага пад Брэстам акумулятарнага завода. На сайце “Радыё Рацыя” з’явіўся артыкул пад назвай “Актывістаў і незалежных журналістаў не пусцілі на прэс-канферэнцыю завода “АйПаўэр”, гэта стала нагодай для складання ў дачыненні Яўгена Скрабца чарговага адміністрацыйнага пратакола. Старшыня суда Брэсцкага раёна Сяргей Маручэк аштрафаваў журналіста-фрылансера таксама на 30 базавых велічынь.

Суддзя Брэсцкага абласнога суда Руслана Сянько, якая разглядала абедзьве касацыйныя скаргі журналіста, пакінула пастановы раённых судоў у сіле.  

Як зазначыў Яўген Скрабец карэспандэнту службы маніторынгу ГА “БАЖ”, казаць пра свабоду слова ў Беларусі, прынамсі ў выпадку з некаторымі незалежнымі журналістамі, пакуль не выпадае. “Але я і надалей буду спрабаваць абскарджваць гэтую справу, у тым ліку і праз Камітэт па правах чалавека ААН”, — кажа брэсцкі фрылансер.