Ціханоўская на канферэнцыі ў Мюнхене заклікала падтрымаць беларускія СМІ і грамадства

Беларуская лідарка пачала вiзiт у Германiю выступам на Мюнхенскай канферэнцыі па кібербяспецы. Пра гэта паведамляе яе тэлеграм-канал.

Падчас выступу Святлана Ціханоўская распавяла пра ролю тэхналогіяў у падзеях 2020 года ў Беларусi, а таксама звярнулася да тэхналагічных кампаніяў, прысутных у залі, з запытам на падтрымку беларускай грамадзянскай і медыясупольнасці. 

Беларуская лідарка падкрэслiла, што дыктатары вучацца выкарыстоўваць тэхналогіі для пераследу палітычных апанентаў. У якасцi доказу яна распавяла пра рэпрэсіі ў Беларусі за актыўнасць у інтэрнэце, спробы Расіі і рэжыму Лукашэнкі пазбавіць людзей доступу да праўдзівай інфармацыі. 

Таксама Святлана Ціханоўская адзначыла, што, нягледзячы на гэта, беларусы ўсё роўна не падтрымліваюць рэжым і не падтрымліваюць вайну супраць Украіны.

Удзел у Мюнхенскай канферэнцыі бяруць больш за 700 экспертаў, палітыкаў і прадстаўнікоў тэхналагічнага сектару. Форум арганізаваны пры падтрымцы Google, Tik­tok, Ama­zon, Leno­vo, Meta, Air­bus і іншых.

«Рада вярнуцца ў Мюнхен. Учора я казала аб ролі тэхналагічных кампаній у абароне дэмакратыі і неабходнасці дужання з дэзінфармацыяй на Мюнхенскай канферэнцыі па кібербяспецы. Я заклікала буйныя тэхналагічныя кампаніі падтрымаць беларускую грамадзянскую супольнасць і незалежныя СМІ», – цытуе допіс Святланы Ціханоўскай Reform.by.

Чытайце яшчэ:

Нармалізацыя як умова выжывання. Што цяпер асвятляюць «перафарматаваныя» выданні

«Яны баяцца і разумеюць, што нас думаць па-іншаму не прымусіш». Інтэрв’ю з Вольгай Такарчук

«Спадзяюся, ў яе атрымаецца». Ксеніі Луцкіной за кратамі споўнілася 40