«Белсат» зноў паспрабуе акрэдытаваць сваіх карэспандэнтаў у Беларусі

Агнешка Рамашэўская-Гузы ў снежні 2005 года была дэпартаваная з Беларусі за сваю прафесійную дзейнасць, і пасля гэтага беларускае консульства ў Варшаве некалькі разоў адмаўляла ёй у візе.

Цяперашні допуск у краіну можа быць вынікам пэўнай лібералізацыі перад прэзідэнцкімі выбарамі, лічыць спн. Рамашэўская. Па яе словах, «Белсат» выкарыстае гэта для таго, каб у чарговы раз паспрабаваць акрэдытаваць у Беларусі сваіх карэспандэнтаў. Але «трэба разумець, што гэтая сістэма непрадказальная», – кажа журналістка.

У 2014 і 2015 г.г. беларускія суды дзевяць разоў штрафавалі беларускіх журналістаў за супрацоўніцтва з тэлеканалам «Белсат» без акрэдытацыі.   

Упершыню «Белсат» падаў у МЗС дакументы на рэгістрацыю прадстаўніцтва тэлеканала як часткі Польскага тэлебачання (TVP) у Беларусі 20 снежня 2008 года.

У лютым Міністэрства замежных спраў прыпыніла іх разгляд, спаслаўшыся на тое, што яны аформленыя неналежным чынам.

У 2009 г. «Белсат» паўторна звярнуўся ў МЗС па рэгістрацыю, але ў ліпені Міністэрства замежных спраў Беларусі паведаміла, што для рэгістрацыі зноў не хапае аднаго дакумента.

У 2013 г. тэлеканалу зноў адмовілі.

23 красавіка 2007 года Польскае грамадскае тэлебачанне (TVP) і Міністэрства замежных спраў Польшчы падпісалі пагадненне пра стварэнне спадарожнікавага тэлеканала «TV Беларусь». Яго дырэктаркай была прызначаная А.Рамашэўская. 18 ліпеня TVP зацвердзіла ў сваёй структуры новы спадарожнікавы тэлеканал, які атрымаў назву «Белсат». Вяшчанне «Белсата» пачалося 10 снежня 2007 года. Канал фінансуецца з рэзервовага бюджэту польскага МЗС.