Экс-кіраўніка прэзідэнцкага пула асудзілі на 15 сутак, яго жонку пакаралі штрафам

Дзмітрыя і Юлію Семчанкаў затрымалі ў Мінску напярэдадні. Жанчыну пасля складання пратакола за “рэпосты з экстрэмісцкіх тэлеграм-каналаў” у прыватным ліставанні адпусцілі ў той жа дзень па павестцы да суда (у сям’і непаўнагадовае дзіця), а мужа-журналіста пакінулі ў ізалятары да высвятлення “наноў узніклых абставін”.

Да апошняга не было зразумела, цягнуць тыя падазрэнні на адміністрацыйную адказнасць або адразу на крымінальную — сутнасць прэтэнзій не разгалошвалася.

16 верасня суд Фрунзенскага раёна Мінска разгледзеў матэрыялы аб “рэпостах” і прыняў рашэнне адправіць колішняга палітычнага аглядальніка тэлеканала АНТ Дзмітрыя Семчанку на 15 сутак адміністрацыйнага арышту. Яго жонку дыпламаваную журналістку Юлію Семчанка, якая цяпер працуе візажысткай, пакаралі штрафам у памеры 960 рублёў.

Раней Дзмітрыя Семчанку ўжо затрымлівалі за “ўдзел у несанкцыянаванай акцыі” 16 жніўня 2020 года і гэтаксама каралі арыштам на 15 сутак.    

Дзмітрый Семчанка нарадзіўся 28 жніўня 1983 года ў Магілёве. Пачынаў кар’еру ў абласным цэнтры на прыватным тэлебачанні, але затрымаўся там ненадоўга – хутка тэлегенічнага вядоўцу заўважылі ў Мінску. Як вынік, цягам 2009–2020‑х гадоў у якасці спецыяльнага карэспандэнта, а пасля і палітычнага аглядальніка ён працаваў на тэлеканале АНТ. У 2012‑м стаў пераможцам нацыянальнага тэлевізійнага конкурсу “Тэлевяршыня” як лепшы рэпарцёр.

Амбіцыі спрыялі хуткаму ўзыходжанню па кар’ернай лесвіцы — даслужыўся да нефармальнага кіраўніка “элітнай” групы журналістаў з  прэзідэнцкага пула. У статусе штатнага прапагандыста дазваляў вольнасці, крытыкуючы не толькі апазіцыю, а і “празмерныя апетыты” высокапастаўленых крамлёўскіх палітыкаў кшталту Дзмітрыя Мядзведзева, якія катэгарычна заклікалі ўключыць Беларусь у склад Расіі. 

Аднак у жніўні 2020 года Дзмітрый Семчанка ўчыніў нечаканы дэмарш – на знак пратэсту супраць неабгрунтаванага гвалту праваахоўнікаў супраць мірных дэманстрантаў звольніўся з тэлеканала АНТ, спадарожна ахвяраваўшы дывідэндамі, якія прыносіла праца ў “пуле”. Публічна асудзіў дзеянні сілавых структур, заклікаўшы прыслухацца да голасу народа, а ўрэшце далучыўся да масавых акцый пратэсту.

10 верасня 2020 года Сёмчанку затрымлівала цэлая каманда з крымінальнага вышуку — па падліках самога журналіста, блізу 10 чалавек. Тады суд Фрунзенскага раёна Мінска пакараў яго 15 суткамі паводле народнага артыкула 23.34 КаАП за ўдзел у несанкцыянаваным масавым мерапрыемстве. На той момант ён яшчэ быў дзейным супрацоўнікам са службовым пасведчаннем АНТ.  Фігурант адміністрацыйнай справы ўтрымліваўся спачатку ў мінскім ізалятары на Акрэсціна, а пасля ў Жодзіне. Ніхто з кіраўніцтва тэлеканала за свайго ўганараванага работніка не ўступіўся.

Літаральна напярэдадні свайго затрымання апальны журналіст паспеў даць інтэрв’ю шэрагу міжнародных СМІ, у тым ліку расійскай тэлевядоўцы Ксеніі Сабчак, якая пасля інцыдэнту з героем свайго ток-шоў правяла такія паралелі: маўляў, арышт у Мінску Дзмітрыя Семчанкі — гэта прыкладна як затрыманне ў Маскве Уладзіміра Познера.  

Пасля вызвалення Дзмітрый Семчанка заявіў, што ніводнага разу не пашкадаваў пра свой учынак.

“Я не баяўся турмы і ў нейкай ступені быў да гэтага гатовы. Не пашкадаваў ні секунды аб тым, што зрабіў. Бо калі разважаць, што лепш — працаваць на цяперашнім АНТ ці сядзець на сутках — дык ужо лепш суткі”, — падсумаваў ён.

Мала за тое, у першай дэкадзе лютага 2021 года напісаў верш, прысвечаны Дню роднай мовы, якой, паводле аўтара, бальшыня беларусаў папросту “здрадзілі”.

Прабач нас, Мова рОдная!

Як шчанюкі бязродныя,

Мы здрадзілі табе.

Мы моўчкі назіралі,

Як маці забівалі,

Казалі, што іх дзьве.

Прабач, што не крычалі,

Як школы зачынялі,

Крыўляліся с цябе.

А мы не разумелі,

Якое цуда мелі.

Засталіся ў журбе.

Мы сэрца прадавалі,

Народны код гублялi,

Боль — каранi iрваць.

Нас проста раз’ядналі.

Нас і людзьмі ня звалі,

Каб статкам кіраваць…

Пазней ён неаднаразова вяртаўся да паэтычнага асэнсавання грамадскіх працэсаў у краіне, выкладаючы свае вершы “на злобу дня” ў сацыяльных сетках.  

Ад лістапада 2020 года Дзмітрый Сёмчанка працуе ў сферы піяр-тэхналогій. Нягледзячы на папярэджанні сяброў з’язджаць за мяжу, бо паўторны арышт — толькі пытанне часу, прынцыпова застаўся ў Мінску.  

Дзмітрый і Юлія Сёмчанкі гадуюць шасцігадовага сына.     

Читайте ещё:

Як мінімум у трох гарадах Беларусі апошнімі днямі адбыліся выклікі на допыт і ператрусы у рэгіянальных журналістаў

16 верасня – 27 гадоў Беларускай асацыяцыі журналістаў

Дзень памяці загінулых ва Украіне журналістаў. У Вільні адкрылася выстава пра працу калег на вайне