Кіраўніца БелТА ў ролі “ваеннага эксперта”: Украіна ўцягвае ў канфлікт NATO, а Польша марыць “адцяпаць” Львоў

Увечары 15 лістапада кіраўніцтва Польшчы заявіла, што ў Люблінскім ваяводстве на ўсходзе краіны ўпалі дзве ракеты, загінулі два мясцовыя жыхары. Цяпер спецыяльная камісія высвятляе, адкуль менавіта былі “прылёты”, але “эксперты ад журналістыкі” ў Беларусі ўжо зрабілі ўласныя высновы: зброя дакладна не расійская, а градус эскалацыі “накручваюць” зацікаўленыя бакі.    

У эфіры “Альфа Радыё”, якое ўваходзіць у холдынг “СБ. Беларусь сегодня”, кіраўніца Беларускага тэлеграфнага агенцтва Ірына Акуловіч паразважала пра тое, хто і якія дывідэнды з падачы “жоўтых медыяў” збіраецца здабыць на інцыдэнце.

“Мы ўсведамлялі, што сітуацыя можа быць скарыстаная, каб ваенныя дзеянні развіваліся больш актыўна, каб уцягнуць краіны NATO ў канфлікт, чаго ніхто не хоча, акрамя Украіны. Калі падрабязнасцяў выбуху і праверанай інфармацыі яшчэ не было, што рабілі польскія журналісты? Тут жа пачалі пісаць аб пападанні дзвюх расійскіх ракет. Гэта стаў прасоўваць і Зяленскі, які літаральна заявіў пра тое, што неабходна спыніць “рускага тэрарыста”. Такія дадзеныя распаўсюджвае і польскі ўрад. Хоць спецыялістам зразумела, што гэта не маглі быць расійскія ракеты”.

Выпускніца Магілёўскага педінстытута Ірына Акуловіч, якая нечакана стала спецыялістам у ваеннай галіне, сцвярджае, што некаторыя з апублікаваных здымкаў “увогуле маюць дачыненне да 2020 года”. І зрабіла выснову, навошта Польшча рукамі “купленых журналістаў” так упарта піярыць версію пра расійскія ракеты.

“Польскія выданні заклікаюць стаць на абарону, лічачы, што натаўцам трэба неадкладна падключыцца да канфлікту [Расіі і Украіны]. Так, з аднаго боку, палякам сітуацыя на руку, каб адхапіць Львоў, хоць ваяваць апасродкавана для іх больш выгадна. Таму такога канфлікту NATO дакладна не хоча. Учора было наглядна бачна, як працуюць фейкі – яны падхопліваюцца на ўзроўні найвышэйшага кіраўніцтва. Вядома, СМІ адыгралі сваю ролю, яны раздзьмулі гэтае вогнішча. А неправеранай інфармацыяй карысталіся людзі, якія маюць дачыненне да кіраўніцтва трох краін”.

Экспертка таксама лічыць, што падзея атрымала такі рэзананс у тым ліку таму, што якраз ідзе саміт G20, а на 16 лістапада яшчэ запланавана і нарада Савета бяспекі ААН у пытанні аказання дапамогі Украіне. Адпаведна, усё зроблена для развіцця сітуацыі “ў правільным кірунку”.

Вярнуўшыся да вобразу кіраўніцы інфармацыйнага агенцтва, Ірына Акуловіч дазволіла сабе павучыць калегаў: маўляў, згаданая сітуацыя –  прыклад таго, як “няправільная інтэрпрэтацыя фактаў” магла прывесці да вельмі сур’ёзных наступстваў. І параіла ў такіх выпадках чытаць “толькі правераныя СМІ, якія адказваюць за кожнае слова”, – відаць, маючы на ўвазе падначаленую рэдакцыю БелТА.

Зрэшты, абвінавачваючы замежныя СМІ ў “распаўсюдзе фейкаў”, сама рэдактарка карыстаецца імі спаўна. У прыватнасці, заявіла, што Польшча перажывае не самыя лепшыя часы, але ўлады не бачаць сваёй віны, абвінавачваюць ва ўсім Расію, а заадно і Беларусь. І завяршыла спіч неймавернымі гісторыямі пра тое, як палякаў нібыта штрафуюць за “ўключаныя кандыцыянеры”, а брытанцы рызыкуюць застацца без “навагодняй ілюмінацыі”. 

“Мы збольшага недаацэньваем тое, што робіцца ў нашай дзяржаве: практычна бясплатны дзіцячы садок, адукацыя. А вы паглядзіце, як у Польшчы пачынаюць штрафаваць за тое, што ўключаны кандыцыянер ці ў кватэры тэмпература вышэй за 18 градусаў. Пра якую свабоду асобы можа ісці гаворка? Ці вось у Мінску ўжо пачынаюць упрыгожваць горад да Новага года, чаго не скажаш пра некаторыя краіны Захаду. Бог з ёй, з ілюмінацыяй, хоць бы былі святло і газ. Пры гэтым я ўпэўненая, што ілюмінацыя будзе ў доме былога прэм’ер-міністра Вялікабрытаніі Борыса Джонсана. Але не ў простага народа”.

Дзяржаўнае агенцтва БелТА ад пачатку поўнамаштабнай агрэсіі Расіі ва Украіне безумоўна апраўдвае вайну, практычна дублюючы інфармацыйныя наратывы крамлёўскай прапаганды.

Чытайце яшчэ:

Палітыка, сатыра, крынж і коцікі. Што незалежныя медыя посцяць у сацсетках?

Як беларуская дзяржаўная прапаганда адрэагавала на вызваленне Херсону

Што такое Infopoint, доступ да якога атрымаў агент ГУБАЗіКа?