Міжнародная спецыялізаваная выстава «СМІ ў Беларусі» пачне работу 11 мая

У юбілейнай выставе «СМІ ў Беларусі», якая пройдзе ўпершыню ў выставачным павільёне па праспекце Пераможцаў, 14, возьмуць удзел нацыянальныя тэлеканалы, інфармацыйныя агенцтвы, вядучыя дзяржаўныя рэспубліканскія масава-палітычныя выданні, рэгіянальныя СМІ, галіновыя выданні, адукацыйныя і дзіцячыя выданні, літаратурна-мастацкія і культуралагічныя выданні, FM-станцыі, дыпламатычныя прадстаўніцтвы ў Беларусі, прадстаўнікі СМІ рэгіёнаў Расійскай Федэрацыі, т.зв. Саюзнай дзяржавы, краін СНД, Кітая, Венесуэлы, Кубы, іншых краін, а таксама недзяржаўныя СМІ.

XX Міжнародная спецыялізаваная выстава «СМI ў Беларусі», якая пройдзе па 14 мая, прадэманструе гісторыю развіцця СМІ ў Беларусі на прыкладах найстарэйшых беларускіх выданняў, а таксама прадставіць новыя камунікацыйныя тэхналогіі, шляхі распаўсюджвання інфармацыі з дапамогай усіх даступных каналаў камунікацыі, у першую чаргу мультымедыйных.

Па традыцыі выстава «СМI ў Беларусі» становіцца пляцоўкай для абмеркавання стану і развіцця беларускага інфармацыйнага поля і планавання на будучыню. У праграме выставы — круглыя сталы, семінары і майстар-класы з удзелам вядучых журналістаў і медыяспецыялістаў з Беларусі і Расіі.

У першы дзень працы выставы будуць уручаныя ўзнагароды XІI Нацыянальнага конкурсу друкаваных сродкаў масавай інфармацыі «Залатая Літара».

У гэтыя ж дні, 11–14 мая, пройдзе ХI Беларускі міжнародны медыяфорум «Партнёрства ў імя будучыні». Да ўдзелу ў медыяфоруме запрошаныя кіраўнікі СМІ, вядомыя палітолагі, эксперты краін СНД, блізкага і далёкага замежжа. Госці возьмуць удзел і ў мерапрыемствах выставы «СМІ ў Беларусі».

Арганізатарамі XX Міжнароднай спецыялізаванай выставы «СМI ў Беларусі» выступаюць Міністэрства інфармацыі, НВЦ «Белэкспа» пры падтрымцы Мінгарвыканкама, Нацыянальнай дзяржаўнай тэлерадыёкампаніі, Саюза выдаўцоў і распаўсюджвальнікаў друку, РУП «Дом прэсы», ГА «Беларускі саюз журналістаў».