На суд да Ігара Бублікава не пусцілі журналістаў

Падтрымаць Ігара ў судзе прыйшло некалькі дзясяткаў чалавек: калегі, сябры гарадзенскай суполкі ГА “БАЖ”, грамадскія актывісты і чытачы NewGrodno.by.

Але іх чакала неспадзянка — міліцыянты  забаранілі ўваходзіць у памяшканне суда ўсім апроч удзельнікаў працэсу: самога Ігара Бублікава і журналісткі TUT.by  Вольгі Камягінай, якая была заяўленая на судзе ў якасці сведкі.

Ігар Бублікаў кажа, што працэс за зачыненымі дзвярыма доўжыўся каля дзесяці хвілін. “Я задаў некалькі пытанняў Вользе Камягінай, затым у мяне запыталі, дзе і калі я рэгістраваў свой рэсурс. Пасля гэтага суддзя абвесціла перапынак у працэсе”, — распавёў журналіст.

Наступнае пасяджэнне ў судзе прызначанае на 7 кастрычніка аб 11‑й гадзіне. На яго Бублікаў плануе прыйсці з адвакатам, таксама намераны патрабаваць адкрытага слухання працэсу.

Вольга Камягіна выказала здзіўленне, што суддзя не мела да яе ніякіх пытанняў:

“Суддзя не задала мне ніводнага пытання. Задаваў іх толькі Ігар, які пацікавіўся, як і дзе адбылося яго затрыманне, ці былі на нас камізэлькі з надпісам “Прэса”. Мяне затым адпусцілі, а яго пакінулі”.

Нагадаем, рэдактара  NewGrodna.by Ігара Бублікава затрымалі супрацоўнікі міліцыі 27 верасня падчас асвятлення вулічнай акцыі пратэсту ў Гродне. У дачыненні да яго завялі адміністрацыйную справу паводле арт. 23.34 КаАП, абвінаваціўшы ва ўдзеле ў несанкцыянавай вулічнай акцыі, і амаль суткі пратрымалі пад вартай.