Прастора “аКсяродак” і “Беларускі гістарычны клуб” — новыя ініцыятывы беларусаў Батумі

Мінчанка Аксана Акуневіч разам з сям’ёй з’ехала ў Батумі ў сакавіку 2022 года. Ад самага пачатку дзяўчына марыла пра прастору, у якой маглі б сустракацца беларусы, якія гэтак жа, як і яна, пераехалі ў Грузію. У Аксаны атрымалася знайсці адпаведны дом у старым горадзе, і ўжо 25 верасня яна адкрыла шматфункцыянальную прастору “аКсяродак”.

Аксана — магістарка тэхнічных навук, аспірантка педагагічных навук. У Мінску яна вяла курс “Чалавечая фізіка” для розных узростаў. Цяпер магчымасць цікава вывучаць фізіку будзе ў беларусаў Батумі. Вядзецца запіс  у некалькі груп для вучняў рознага ўзросту. І нават для дарослых — “Фізіка пад вінцо”.

Таксама будуць праводзіцца заняткі для дзяцей па рукадзеллі і кулінарыі.

Акрамя таго, за пэўную плату можна карыстацца прасторай “аКсяродак” як каворкінгам і калёрнінгам (месцам для сумеснага навучання і развіцця дзяцей).

Раз на два тыдні ў “аКсяродку” будуць праходзіць сустрэчы “Беларускага гістарычнага клуба”. Яго ў Батумі арганізавалі два беларускія журналісты — Андрэй Мялешка і Ілля (з прычын бяспекі хлопец папрасіў не называць яго прозвішча). Андрэй Мялешка — гісторык паводле адукацыі, Ілля даўно піша гістарычныя артыкулы для СМІ.

Першая сустрэча гістарычнага клуба была прысвечаная бітве пад Воршай, другая, ужо ў прасторы “аКсяродак” — падзеям 17 верасня 1939 года.

“Ідэя гэтага клуба нарадзілася ў нас з Іллёй, бо мы хацелі гістарычную навуку даваць простымі словамі без акадэмізму, — распавёў Андрэй Мялешка. — Летась гістарычныя сустрэчы ў Батумі беларусы ладзілі разам з украінцамі, але той хлопец цяпер займаецца іншымі справамі. Яшчэ такі момант — тыя сустрэчы былі акадэмічнага фармату, і людзі хутка стаміліся ад гэтага. У нас жа будзе дыскусійны, размоўны клуб”.

Андрэй і Ілля плануюць запрашаць на сустрэчы клуба польскіх і ўкраінскіх гісторыкаў, якія будуць прыязджаць у Батумскі ўніверсітэт ім Ш. Руставелі.

Журналіст выказвае спадзяванне, што сёлета ў лістападзе ў Батумі завітаюць таксама беларускія гісторыкі.

Наведваць сустрэчы гістарычнага клуба Андрэй запрашае не толькі беларусаў, але і ўкраінцаў, і грузінаў.

Тэмы для дыскусій будуць абірацца паводле “Гістарычнага календара на штодзень”, складзенага беларускім журналістам Уладзімірам Хільмановічам з Гародні. Усе сустрэчы — бясплатныя, аднак арганізатары будуць удзячныя за данаты, якія пойдуць на дапамогу ў аплаце арэнды прасторы “аКсяродак”, падкрэслівае Андрэй Мялешка.

“Мы з Іллёй за свае лекцыі грошы не просім, — кажа журналіст. — Не мае значэння таксама, як шмат людзей будзе прыходзіць на сустрэчы. Для мяне найперш важна перадаць свае веды. Пра гісторыю Беларусі мы можам распавядаць і двум-тром асобам, бо мы хочам падзяліцца ведамі з тымі, каму гэта цікава і патрэбна”.

Чытайце яшчэ:

Трымаюцца бадзёра, не губляюць надзеі: сабралі навіны ад калег-палітвязняў

«Пакаянныя» відэа: што яны парушаюць і як уздзейнічаюць на чалавека

“Блакіроўка Telegram-каналаў — удушэнне свабоды слова”. Мінінфарм заклапаціўся сваімі “рупарамі”