Віцебскі відэаблогер Віталь Усціновіч паведаміў, што ідзе ў суд і знік. Верагодна, яго пакаралі «суткамі»

Суткі відэаблогер правёў у ІЧУ, а потым яго адпусцілі з позвай у суд на 13 лютага. Па дарозе ў суд Першамайскага раёна Віцебска ён і запісаў на відэа свае разважанні пра тое, што здарылася:

«Напісалі, нібыта я мітынг праводзіў. Канешне, я гэтага не рабіў. Здавалася б, нікуды не лез, здымаў толькі рыбалку, падарожжы і дэгустацыю кансерваў. Адваката я не стаў браць, бо наўрад ці ў маёй сітуацыі гэта дапаможа. Ну, што зробіш! У такія часы нялёгкія жывём. Трэба і гэта перажыць».

Апошні відэаролік, які з’явіўся на канале Віталя Усціновіча, зрабілі і размясцілі, падобна, самі міліцыянты. Там ёсць фрагменты так званага «пакаяльнага відэа», дзе блогер гаворыць, што пакідаў каментары на «забароненых» сайтах і здымаў відэаролікі «пра Шоўшэнку».

«Дзед Шоўшэнка» — гэта персанаж з вусамі і сіпатым голасам, які прэтэндуе на тое, што лепей за ўсіх разбіраецца ў палітыцы, эканоміцы, культуры і ўвогуле ва ўсіх сферах жыцця. У ролі «дзеда Шоўшэнкі» выступаў сам відэаблогер. А яшчэ ён запачаткаваў гумарыстычную серыю «Ябатькины новости», дзе выкарыстоўваў фрагменты відэа з Ярмошынай, Азаронкам і іншымі пазнавальнымі асобамі.  Але ўсё гэта Віталь Усціновіч рабіў да сакавіка 2022 года. У той час яго затрымалі, канфіскавалі аргтэхніку, і ён публічна паведаміў сваім гледачам, што больш «не чапае жыццё краіны», а відэаролікі будзе здымаць выключна пра рыбалку, падарожжы па закінутых вёсках і дэгустацыю прадуктаў.

Ад гэтага правіла ён не адступаў, хоць вострыя каментары ў ягоных відэароліках трапляліся. Прыкладам, здымаючы закінутыя дзіцячыя лагеры ці разбураныя хаты ў нежылых вёсках, ён неаднаразова падкрэсліваў, што «гэта адбываецца ў нашай стабільнай квітнеючай краіне».

Ідучы на адміністрацыйны працэс у суд, Віталь Усціновіч паабяцаў сваім падпісчыкам, што абавязкова распавядзе працяг гісторыі пра высунутае яму абвінавачанне ў правядзенні несанкцыянаванага масавага мерапрыемства. Аднак відэаролік пра гэта не выйшаў, адпаведна, можна меркаваць, што відэаблогер не мае магчымасці яго зрабіць і выкласці. Бо, найхутчэй, знаходзіцца пад арыштам.

Чытайце яшчэ:

«Яны баяцца і разумеюць, што нас думаць па-іншаму не прымусіш». Інтэрв’ю з Вольгай Такарчук

«Я апынуўся ў камандзіроўцы ў гэтай сістэме зла». Першае інтэрв’ю блогера Сяргея Пятрухіна пасля эвакуацыі з Беларусі

Магілёўскага відэааператара Яўгена Глушкова трымаюць у СІЗА і вінавацяць «за ўдзел у экстрэмісцкім фарміраванні»