Да брэсцкага блогера Сяргея Пятрухіна прыйшлі судовыя выканаўцы, каб арыштаваць маёмасць

У выніку брэсцкі блогер быў пакараны штрафам у памеры 360 базавых велічынь (9 180 рублёў), таксама з яго спагнана дзяржаўная пошліна на 306 рублёў.

У якасці пацярпелых па гэтай справе праходзілі чатыры супрацоўнікі Ленінскага РАУС Брэста. Паводле рашэння суда першай інстанцыі, Сяргей Пятрухін мусіць сплаціць матэрыяльную кампенсацыю маральнай шкоды: Сяргею Ігнацюку — 3 000 рублёў, Дзмітрыю Якушэвічу, Ігару Галянцічу і Сяргею Токуну — па 1 500 рублёў кожнаму. Таксама блогер павінен кампенсаваць выдаткі супрацоўнікаў міліцыі на адвакатаў агулам на 1 000 рублёў.      

5 ліпеня судовая калегія па крымінальных справах Брэсцкага абласнога суда разледзела апеляцыйную скаргу Сяргея Пятрухіна і і пакінула рашэнне суда першай інстанцыі без зменаў.

Аддзел прымусовага выканання Ленінскага раёна Брэста 19 жніўня наклаў арышт на  маёмасць блогера. Найбольш каштоўная рэч — пральная машына Самсунг 2007 года выпуску, судовыя выканаўцы ацанілі яе ў 100 рублёў. У спісе арыштаваных рэчаў таксама: няспраўная мікрахвалёвая печ LG 2008 года выпуска (ацэненая ў 10 рублёў), манітор коштам у 5 рублёў і прынтар Самсунг, якому ужо 18 гадоў, ацанілі яго ў 50 рублёў. Гэты прынтэр арыштаваны ўжо другі раз — раней яго забіралі ў жніўні 2018 года, калі ў кватэры Сяргея Пятрухіна супрацоўнікі АМАП учынілі ператрус.

Сяргей Пятрухін з іроніяй адзначае, што гэтыя рэчы пойдуць у якасці спагнання доўгу на карысць “ахвярам злачынства”. Усю арыштаваную маёмасць павінны вывезці з кватэры Сяргея Пятрухіна праз дзесяць дзён.