Галоўрэд глыбоцкай раёнкі не сцішаецца і працягвае абражаць незалежныя медыі

Галоўны рэдактар глыбоцкай раённай газеты «Веснік Глыбоччыны» Андрэй Панкрат працягвае абражаць сваіх апанентаў, у якасці якіх абраў сабе незалежныя медыі.

Галоўны рэдактар глыбоцкай раённай газеты «Веснік Глыбоччыны» Андрэй Панкрат. Фота: vg-gazeta.by

Прапагандыст абвінавачвае незалежныя СМІ

На сайце раённага дзяржвыдання Андрэй Панкрат размясціў артыкул пад назвай «Праўда пра танк з бчб-сцягам у Курскай вобласці».

У ім ён называе незалежныя беларускія медыі так званымі «СМІ збеглых здраднікаў». Пасля згадвае, што ў інтэрнэце з’явілася навіна пра тое, што ў Курскую вобласць разам з ВСУ уварваўся і танк з бчб-сцягам на борце.

Галоўрэд абвінавачвае незалежныя СМІ, што яны быццам падаюць хлуслівую інфармацыю пад падліўкай з гонару і веліччу, змешваючы яе з каментарамі «саманазваных экспертаў», якія «бачаць у гэтым прыкметы хуткай перамогі Украіны над Расіяй», а следам і «ваеннага ўмяшання ў Беларусь».

«Праўда, уся гэтая шуміха больш адлюстроўвае іншае: беднасць станоўчых навін як на ўкраінскіх франтах, так і ў табары збеглых здраднікаў, у якіх не засталося нічога, акрамя рукі дзядзечкі Сэма», — піша Андрэй Панкрат.

Але пасля ён не згадвае, што беларускія незалежныя рэсурсы якраз і напісалі пра тое, што гэты танк са сцягам быў зняты ў пасёлку Кіяніца Сумскай вобласці падчас дарогі на Курскую вобласць. Пра гэта пісала і «Наша ніва». Рэдактар глыбоцкай раёнкі падае на сайце, што быццам інтэрнэт-актывісты выкрылі гэты падман, на яго думку.

«Збеглыя працягваюць прапагандаваць хлусню, няма нічога дзіўнага — прылада мозгу такая», — зазначае Панкрат.

Ён хавае ад сваіх чытачоў тое, што незалежныя СМІ якраз узялі каментар у беларускіх вайскоўцаў, якія паведамілі дакладную інфармацыю, што беларусы ёсць у Курскай вобласці і яны сапраўды там ваююць, і што ў іх ёсць танкі, на якіх заязджалі ў Курскую вобласць. 

Танк пад бчб-сцягам. Скрыншот видэашэрагу тэлеканала «Белсат»

Паводле слоў Панкрата, яго засмучае тое, што беларусы вераць незалежным СМІ. Таму ў сваім прапагандысцкім артыкуле ён далей працягвае абражаць беларусаў, што вымушана з’ехалі з радзімы, і называе «славеснай вакханаліяй» каментары пра вучэнні Узброеных Сіл Беларусі па адпрацоўцы сцэнару захопу супернікам памежных раёнаў краіны.

У чужым воку…

Пры гэтым Украіну ён называе краінай, якая гіне, таксама наракае на ЗША, што быццам адтуль падчас каляровай рэвалюцыі ва Украіне раздавалі «пячэнькі» людзям, якія быццам сталі марыянеткамі ў руках лялькаводаў.

На думку рэдактара глыбоцкай раёнкі, не было б лішнім паўтарыць тыя вучэнні, але ўжо ўлічваючы «курскі» досвед.

Далей ён вінаваціць беларусаў. Якія з’ехалі, ў тым, што яны быццам хочуць распачаць вайну на тэрыторыі Беларусі, і называе іх здраднікамі. Зноў згадвае ўлады ЗША і піша пра дыскрэдытацыю Аляксандра Лукашэнкі.

«Збеглыя чакаюць зручнага моманту, каб закінуць агонь вайны і на нашу тэрыторыю, але рабіць гэта ўласнаручна баяцца, спадзяюцца на Украіну», — даводзіць Панкрат.

У сваім артыкуле ён згадаў і тых, хто загінуў і быў паранены ў Курскай вобласці Расіі, нават прывёў лічбы, праўда, не пазначыўшы з якіх крыніц ён іх узяў. А вось пра загінулых ва Украіне ад рук расейцаў, у тым ліку больш за 600 дзяцей і больш за 1420 параненых дзяцей, ён прамаўчаў.

Падсумаваў Андрэй Панкрат свой прапагандысцкі артыкул наступнымі словамі:

«Нам не варта забываць, што вайна заўсёды прыносіць толькі пакуты і разбурэнні, а ўплыву хлусні і маніпуляцый лёгка паддацца, калі яе шмат. Няхай кожны з нас застанецца пільным і гатовым абараняць сваю Радзіму ад ворагаў па-за і ўнутры яе».

Вось толькі рэдактар «Весніка Глыбоччыны» не піша пра тое, адкуль у Беларусі ўзяліся ворагі і з чыёй тэрыторыі пачалася вайна ва Украіне.